Mu gihe byari biteganyijwe ko Perezida wa Uganda, Joel Kaguta Museveni ari mu bakuru b’ibihugu 26 bari bitezwe kwitabira Inama Idasanzwe ya Afurika yunze Ubumwe (AU) igomba kubera mu Mujyi wa Kigali kuva kuri uyu wa Mberee tariki 19 kugeza 22 Werurwe 2018, yasubitse bitunguranye urugendo rwe ndetse ahita anategeka abarinzi be bari bamaze kugera mu Rwanda guhita basubirayo.
Ikinyamakuru Chimpreports dukesha iyi nkuru kivuga ko Perezida Museveni ari mu bakuru b’ibihugu bari bategerejwe mu Rwanda cyane ko yari yamaze kwemeza ko azitabira Inama Idasanzwe ya Afurika yunze Ubumwe (AU).
Mu gitondo cyo kuri uyu wa Mbere nibwo hamenyekanye amakuru y’uko Perezida Museveni yasubitse urugendo yari kugirira mu Rwanda n’ubwo hatatangajwe impamvu nyamukuru zatumye asubika urugendo habura amasaha make.
Iki kinyamakuru kivuga ko Goverinoma ya Uganda yari yamaze kohereza itsinda ry’abayobozi bagombaga guherekeza Umukuru w’igihugu muri iyi nama ndetse na bamwe mu bamucungira umutekano, aho bo bari bamaze kugera i Kigali kuri iki Cyumweru tariki 18 Werurwe 2018.
Aba bose bari bamaze kugera mu Rwanda bahise basabwa na Leta ya Uganda guhita basubira mu gihugu cyabo ngo kuko urugendo rw’Umukuru w’igihugu rwasubitswe.
Muri iyi minsi umubano w’u Rwanda na Uganda ntabwo uhagaze neza, aho hari Abanyarwanda bakunze kugirirwa nabi muri Uganda, gusa mu kiganiro Minisitiri w’Ububanyi n’Amahanga Louise Mushikiwabo aherutse kugirana n’Abanyamakuru, yavuze ko Abakuru b’Ibihugu byombi baganiriye kuri iki kibazo.
Ukwezi.rw
