Ishyaka ritavuga rumwe n’ubutegetsi mu Rwanda ryatangaje ko umuyobozi waryo Victoire Ingabire ukomeje gukorwaho iperereza ku bitero biheruka ku Rwanda ari gukorerwa “iyicarubozo mu bitekerezo”.
Mu ijoro ryo ku wa gatanu tariki 04 y’uku kwezi kwa 10, abantu bitwaje intwaro baturutse mu birunga batera mu Rwanda bica abaturage bagera kuri 14 mu karere ka Musanze banasahura ibyabo.
Kuva ku wa kabiri tariki 08 y’uku kwezi, Madamu Victoire Ingabire uyobora ishyaka FDU-Inkingi yahamagajwe n’urwego rushinzwe iperereza ku byaha (RIB) ngo abazwe kuri ibi bitero.
Mu cyumweru gishize, Madamu Ingabire yabwiye BBC ko ntaho ahuriye n’ibitero byabaye ko we “urugamba arimwo atari urw’amasasu ahubwo ari urwa politike”.
Icyo gihe, umuvugizi w’urwego rw’ubugenzacyaha mu Rwanda yabwiye itangazamakuru mu Rwanda ko atavuga ibyo Madamu Ingabire ari kubazwaho kuko bikiri mu iperereza.
Mu myaka ishize ubwo yaburanaga ibyaha afunze, yashinjwe gukorana n’umutwe wa FDLR urwanya ubutegetsi bw’u Rwanda ukorera muri DR Congo, ibyaha we yahakanye.
Ishyaka rye FDU-Inkingi, ritaremerwa n’amategeko mu Rwanda, ryasohoye itangazo rivuga ko Madamu Ingabire akomeje kubazwa ariko bikorwa mu buryo bugamije “kumwica mu bitekerezo”.
https://youtu.be/HCjrgEI3ztA
FDU Inkingi ivuga ko itishimiye uko Victoire Ingabire ari kubazwa
Iri shyaka rivuga ko ejo tariki 15/10 yahamagajwe kujya kwicara kuri uru rwego ruri kumubaza, nyamara ngo bazi neza ko umunyamategeko we adahari kandi atabazwa uyu umwunganira adahari.
Mu cyumweru gishize, Madamu Ingabire yitabye uru rwego inshuro enye, zimwe akahamara umwanya munini atabajijwe kuko umunyamategeko we adahari nk’uko uruhande rwe rubivuga.
Itangazo ry’iri shyaka rivuga ko ibazwa rye rikomezwa uyu munsi ku wa gatatu.
Rigira riti: “Ibi byose bikorwa biboneka ko bigamije kumwica mu bitekerezo, kumuca intege no kumukoza isoni”.
Kuva yarekurwa mu kwezi kwa cyenda mu 2018 ku mbabazi za perezida wa repubulika, Ingabire Victoire ategetswe kwitaba buri kwezi ibiro bimwegereye by’ubushinjacyaha.
BBC