Urwego rw’Ubugenzacyaha, RIB rwemeje ko kuri uyu wa Gatandatu rwasatse urugo rwa Ingabire Victoire, mu iperereza ririmo gukorwa ku mikoranire n’imitwe irwanya leta, nyuma y’umuntu wafashwe ashaka gutoroka igihugu ngo ajye kwifatanya nayo.
Umuvugizi wa RIB Marie Michelle Umuhoza, yabwiye IGIHE ko iri saka ririmo rikorwa mu iperereza nyuma y’uko kuri uyu wa Gatanu yataye muri yombi uwitwa Gaston Munyabugingo, mu kubazwa biza kugaragara ko hari abantu bagomba “gusakwa hakurikijwe n’amakuru yarimo atanga.”
Yakomeje ati “Yafashwe ejo arimo agerageza gutoroka ajya kwifatanya n’imitwe irwanya leta. Ni muri urwo rwego rero harimo hakorwa ibikorwa by’iperereza, nta nubwo ari kuri Ingabire gusa, hari n’ahandi hari buze kugenda hasakwa cyangwa se harimo hanasakwa.”
Umuhoza avuga ko Ingabire na Munyabugingo basanzwe bafite imikoranire, nubwo atabitanzeho amakuru arambuye kuko bikiri mu iperereza.
Uyu Munyabugingo yakoraga muri Minisiteri y’Uburezi nk’umukozi ushinzwe amasomero ya leta n’amasomero rusange. Mbere yaho yakoze mu Karere ka Nyarugenge nk’umukozi ushinzwe ibijyanye n’itangazamakuru.
Si ubwa mbere Ingabire Victoire akekwaho imikoranire n’imitwe yitwaje intwaro igamije guhungabanya umutekano w’u Rwanda, kuko n’umwaka ushize yahagamajwe n’ubugenzacyaha ngo abazwe ku bitero byagabwe mu Kinigi mu Karere ka Musanze, bihitana abaturage 14 abandi 18 barakomereka.
Ni ibitero byagabwe mu buryo Polisi y’u Rwanda yahamije ko “bubabaje cyane” kuko hakoreshejwemo intwaro gakondo zirimo amasuka n’amabuye. Inzego z’umutekano zishe abantu 19 mu bagabye igitero, abandi batanu bafatwa mpiri, abasigaye bahungira muri Uganda.
Bemeye ko baturutse mu mutwe wa RUD Urunana, uri mu rwunge rw’indi mitwe y’abarwanyi ishamikiye ku mashyaka atanu yishyize hamwe mu cyiswe P5, arimo Amahoro People’s Congress, Forces Démocratiques Unifieés – Inkingi (FDU-Inkingi); People’s Defence Pact-Imanzi (PDP-Imanzi), Rwanda National Congress (RNC) na PS Imberakuri.
Ingabire Victoire yahamagajwe n’Ubugenzacyaha kubera ko ishyaka rye FDU Inkingi ari rimwe mu mashyaka agize ihuriro P5 rikekwaho kuba inyuma y’icyo gitero.
Igihe.com