Ku itariki nk’iyi isi izirikana umunsi mpuzamahanga w’abantu bashimuswe bakaburirwa irengero, igikorwa gitera ubwoba abasigaye n’abantu babo bahorana agahinda bategereje inkuru y’ababo.
Gushimuta abantu bakaburirwa irengero biravugwa mu Burundi no mu Rwanda.
Abana babiri bato ba Eugène Ndereyimana uheruka kubura mu Rwanda bahora babaza nyina aho papa wabo yagiye nk’uko umugore we yabibwiye BBC. Yagiye agiye mu gikorwa cya politiki.
Ubu hashize ukwezi kurenga Ndereyimana abuze, hari imiryango imaze amezi menshi n’imyaka mu Burundi no mu Rwanda, yibaza niba ababo bakiriho cyangwa barapfuye.
Umuryango w’abibumbye (UN) uvuga ko ibi bikorwa bidatera ubwoba n’umutekano mucye abo mu miryango y’abashimuswe gusa ahubwo binatera ubwoba rubanda rwose rubimenye.
Ibi ntabwo ari umwihariko w’u Burundi n’u Rwanda kuko bigikorwa n’ahandi henshi ku isi nk’uko bivugwa na UN.
UN ivuga ko cyera ibi byakorwaga n’ubutegetsi bw’igitugu bwa gisirikare, ariko ubu bikorwa ku mpamvu zitandukanye cyane cyane gutera ubwoba no gucecekesha abatavuga rumwe n’ubutegetsi.
UN ivuga ko abibasirwa kenshi ari: abaharanira uburenganzira bwa muntu, bene wabo, abatangabuhamya mu manza, abakekwaho iterabwoba, abatavuga rumwe n’ubutegetsi n’abandi…
“Abana bahora bambaza ngo ese papa ari hehe?”
Mu Rwanda mu bihe bya vuba, abantu ku giti cyabo, umutwe wa politiki n’imiryango itegamiye kuri Leta, bavuga ko abantu bashimuswe bakaburirwa irengero.
Ishyaka FDU-Inkingi ritavuga rumwe n’ubutegetsi rivuga ko abantu baryo; Illuminée Iragena (2016) wari umuforomokazi, Boniface Twagirimana (2018) na Eugène Ndereyimana bashimuswe bakabura.
Umuyobozi w’iri shyaka -ritaremerwa n’amategeko mu Rwanda- yabwiye BBC ko kugeza n’uyu munsi nta nkuru y’aba bantu batatu barongera kumva kuva babura.
Mu byumweru bibiri bishize, Ndereyimana w’imyaka 29 yari amaze ukwezi abuze, umugore we yabwiye BBC ko “bikomereye umuryango we kubura umuntu wari ubatunze batazi niba akiriho cyangwa yarapfuye”.
Madamu Joselyne Mwiseneza yagize ati: “Ni urugamba rukomeye, abana baracyari bato, ntabwo babashije kubyakira, bahora bamutegereje, bambaza ngo ese papa ari hehe?”
Nyuma yo kubura k’uyu, urwego rushinzwe iperereza rwabwiye BBC ko rwashyikirijwe ikirego ko Ndereyimana yabuze rugahita rutangira kugikurikirana.
Mu 2014 umuryango wa Human Rights Watch watangaje urutonde rw’abantu 14 baburiwe irengero mu burengerazuba bw’u Rwanda.
Mu bo uyu muryango wavuze ko babuze harimo; Anne-Marie Murekatete (03/2014), Virginie Uwamahoro (04/2014), Hassani Bizimana (04/2014), Jean-Bosco Bizimungu (04/2014) n’abandi.
Mu ntangiriro z’uku kwezi, Diane Rwigara umunyapolitiki utavuga rumwe na leta yandikiye ibaruwa ifunguye Perezida w’u Rwanda, avugamo uruhare rw’ubutegetsi mu gushimuta no kubura kwa bamwe.
Madamazera Rwigara yavuze muri bo Muyenzi Fidel Thadée ko yashimutiwe i Nyabugogo na Aimé Ntabana ko yashimutiwe muri Uganda, aba ntibongeye kuboneka.
Leta y’u Rwanda yahakanye ibirego byo gushimuta bamwe mu bavuzwe ndetse yahagaritse umuryango Human Rights Watch gukorera mu Rwanda ivuga ko urenga ku masezerano wagiranye na Leta.
#Ndondeza i Burundi
Mu myivumbagatanyo ya politiki ya 2015 na ‘coup d’etat’ yaburijwemo ndetse na nyuma yabyo hari abantu benshi bashimuswe baburirwa irengero, imiryango itegamiye kuri Leta ivuga abantu 83,hari abavuga ko barenga.
Bamwe mu batavuga rumwe n’ubutegetsi bashinze urubuga bise “Ndondeza” aho batabariza ababuriwe irengero.
Aba bavuga ko mu mwaka ushize gusa hashimuswe abantu benshi mu buryo butandukanye, aba biganjemo abakora politiki batavuga rumwe n’ubutegetsi, harimo n’abadakora politiki.
Muri bo harimo; Vianney Havyarimana, Prosper Nduwayo, Marius Ndayikengurutse, Jean-Bosco Nibasumba, Ingénieur Matthieu Ndayizeye n’abandi….
Benshi kandi bibuka umunyamakuru Jean Bigirimana washimuswe akabura ubu hashize iminsi 1133 umuryango we n’abakoranaga nawe batazi irengero rye.
Mu kwezi kwa cyenda umwaka ushize minisitiri Martin Nivyabandi ushinzwe uburenganzira bwa muntu yabajijwe ikibazo cy’abashimutwa bakaburirwa irengero mu nteko ishinga amategeko.
Yasubije ko abantu bakwitondera kuvuga ko umuntu yabuze kuko ‘hari abantu babura bakazaboneka nyuma y’ukwezi cyangwa umwaka’. Ndetse ko ngo hari ababoneka nyuma y’imyaka myinshi.
Uwufise ububasha kw’isanamuMSDImage captionGuido Nshimiriko, ishyaka rye MSD rivuga ko yatwawe n’inzego zishinzwe umutekano tariki 14 z’uku kwezi akabura kugeza ubu
Mu kwa 12/2010 inama rusange y’umuryango w’abibumbye yatoye umwanzuro 65/209 uvuga ko ishimutwa n’ibura ry’abantu byiyongereye ku isi mu buryo buteye inkeke.
Ishyaka MSD ritavuga rumwe n’ubutegetsi mu Burundi, kuwa kabiri tariki 27 z’uku kwezi kwa munani ryatangaje ishimutwa n’ibura rya Guido Nshimikiro umuyobozi w’iri shyaka muri Komini Kamenge.
Iri shyaka rivuga ko yatwawe n’inzego zishinzwe umutekano.
BBC yagerageje kuvugana n’ubuvugizi bw’urwego rushinzwe umutekano mu Burundi ku ishimutwa n’ibura ry’abantu ariko ntibyashoboka kugeza ubu.
Ababuze babo batazi ibyababayeho, bo bahora bategereje mu bwoba n’agahinda kumva inkuru y’ababo.