Rugali.com

Amakuru ashyushye yo mu karere

Uwazura Gaddadi akareba uburyo Kagame yasimbuye Mobutu

Ibyo utamenye ku ruzinduko rwa Gaddafi mu Rwanda muri 1985. Uko wamufata kose, Gaddafi yabaye ikimenyabose kuva ku bato kugeza ku bakuru ku mugabane wose utuwe kuri iyi si.

Ubwamamare bwe si ubwa none. Ku wa Kane tariki 16 Gicurasi 1985 ubwo yazaga mu Rwanda byari ibicika. Icyo gihe amashuri muri Kigali yari yafunze imiryango, radio y’igihugu yiriwe itangaza uruzinduko rwe, imihanda minini yamukuburiwe.

Urwo ruzinduko rw’iminsi ibiri rwasize amateka menshi ndetse n’ibihuha byinshi.

Ibyavugwa byose, ikitazibagirana ni uko yasize umwuka mubi hagati y’u Rwanda na Zaïre nyuma yo gutuka uwari Perezida wayo Mobutu Sese Seko, akamwita umuboyi w’abazungu.

Umunsi Gaddafi agera mu Rwanda

Gaddaffi yaje mu Rwanda avuye i Burundi, asanga ruyoborwa na General Major Habyarimana Juvenal wari umaze imyaka 12 ku butegetsi. Ni nawe wamwakiriye ku kibuga cy’indege.

Abana b’abayisilamu bigaga kuri Essi Nyamirambo, ikigo cyitiriwe Gaddafi ni bo bagiye kumwakira ku kibuga cy’indege i Kanombe, Orchestre Abamararungu iramucurangira.

Mu muhanda uva ku kibuga cy’indege abaturage bari benshi, bose bashikiye kureba umuyobozi ukomeye wa revolusiyo ya Libya, wafatwaga nka Perezida wa mbere ukize muri Afurika.

Ku mugoroba wo kuri uwo wa Kane Habyarimana yaramwakiriye, Gaddafi avugira ijambo ryasize urunturuntu hagati ya Zaïre n’u Rwanda.

Libya n’ibindi bihugu by’Abarabu bari bararakajwe cyane n’intambara ya Israel yo kwiyomekaho uduce twa Palestine yari ishyigikiwe n’ibihugu by’i Burayi na Amerika.

Abarabu benshi bafataga Israel nk’umugambanyi ugamije kurimbura Abarabu aho bari hose ku Isi.

Igihugu cyose cyacudikaga na Israel abarabu bakirwanyirizaga kure. Ubwo Gaddaffi yazaga mu Rwanda, Mobutu wa Zaïre yari mu ruzinduko rw’iminsi itandatu muri Israel yagiye kubyutsa umubano.

Gadaffi ubwo yari ahawe umwanya mu mugoroba yakiriwemo na mugenzi we w’u Rwanda, yashimye umubano mwiza wari hagati y’u Rwanda na Libya ndetse n’ingufu zihari zo kubaka Afurika Yunze Ubumwe, gusa ashimangira ko Afurika yatangiye kwinjirirwa na ba gashakabuhake babinyujije mu baboyi (abakozi) babo barimo na Mobutu.

Ibiro Ntaramakuru Jamahiriyah ku wa 17 Gicurasi 1985 byanditse bivuga ko yagize ati “Ubu tuvugana, umuboyi mubi w’abazungu Mobutu ari guhura n’abakoresha be mu bice bya Palestine byigaruriwe na Israel.”

“Icyakora Abanyafurika ntibazihanganira abo baboyi, bazabahana. Abanyafurika muri Sudani babyerekanye bahana Stooge Numayri wakoranaga n’abahezanguni mu gushimuta aba Falasha abajyana muri Palestine. Yakoranye na ba gashakabuhake azi ko bizamwongerera iminsi muri politiki ariko nibyo byamurimbuye.”

Yakomeje agira ati “Ibi ni nabyo dusaba abaturage ba Afurika muri Zaïre , gukurikiza urugero rw’abanya Sudani bagakuraho umukozi wa ba gashakabuhake Mobutu […]Turi kwirwanaho kandi tubamenyesha ko Afurika ari iy’abanyafurika.Turambiwe abakozi ba gashakabuhake muri Afurika nka Mobutu kandi azavaho nabi.”

Nyuma y’iyi mbwirwaruhame, abantu bagize impungenge ku mubano w’u Rwanda na Zaïre dore ko Moboutu yafataga Habyarimana nka murumuna we.

Sheikh Mbarushimana Suleiman, ni umuvugizi wa Mufti w’u Rwanda. Gaddafi ubwo yazaga mu Rwanda yigaga mu mwaka wa mbere w’amashuri yisumbuye.

Aganira na IGIHE, yavuze ko imbwirwaruhame ya Gaddaffi yasize icyoba mu banyarwanda bibaza uko Habyarimana ari bwitware kuri Mobutu.

Ati “Abantu baravuze bati akoze ishyano, atutse Perezida wa Zaïre kandi ari inshuti y’u Rwanda. Ntituzi uko Habyarimana yabigenje kugira ngo Zaïre itarakara. Nta rwango rwakurikiyeho bashobora kuba baravuganye bati uriya ni umusazi mumwihorere.”

Nubwo Gaddaffi yari yarakajwe n’uruzinduko rwa Mobutu, icyari gikomeye cyane ni uburyo yari yatangiye kuganira ibyo guhabwa intwaro na Israel.

Ibiro Ntaramakuru by’Abanyamerika, AP, byo ku itariki 17 Gicurasi 1985 byavuze ko Israel yari yemereye Mobutu kujya imugurisha intwaro ku giciro gito.

Gaddafi we yabibonaga nk’ubushotoranyi kuko ari mu Rwanda yivugiye ko adashobora kwihanganira umunyafurika wese wakwiha gukorana na Israel.

Icyakora, tariki 26 Gicurasi 1985 ubwo Gaddaffi yakiraga ba ambasaderi bari mu gihugu cye, yavuze ko ba Perezida w’u Rwanda n’u Burundi bamwingize ngo abe aretse gufata imyanzuro ikakaye kuri Zaïre , bamusaba kubanza kugirana ibiganiro.

Yatashye Essi Nyamirambo, anayobora Ijuma

Ku wa gatanu tariki 17 Gicurasi, Gaddafi yazindutse ajya gutaha ikigo cyamwitiriwe i Nyamirambo kirimo umusigiti n’ikigo cy’amashuri.

Kuva kuri Onatracom, Biryogo kugeza aho ikigo cyubatse, abayisilamu baturutse mu mpande zose z’igihugu bari bahagaze ku muhanda baje kumwakira.

Nzamwita Abdou ni umurinzi wa Essi Nyamirambo guhera mu 1979.

Gaddaffi yaje akiri umusore ufite imyaka nka 30. Avuga ko uwo munsi abagore bamusasiye ibitenge akanyuraho ari nako asuhuza abaturage.

Ati “Abasiramukazi bashashe ibitenge n’amakanga anyuraho guhera mu Biryogo. Bamusabye kuvamo agenda n’amaguru bamwishimiye, bamuririmbira bamwe abasuhuza mu ntoki. Ageze hano i Nyamirambo asanga birashyushye. Asanga hose haruzuye, Tapi Rouge hari abantu bashaka kumureba.”

Sheikh Mbarushimana Suleiman avuga ko uwo munsi ari umwe mu bakoze mu ntoki za Gaddafi.

Ati “Kwa kundi yagendaga abasuhuza bamukora mu ntoki ni uko nanjye nakoze mu ntoki ze. Yari afite abamurinda b’abakobwa. Bo ntibemeraga umuntu ubuza abantu gusuhuza Perezida. Bahitaga bigizayo n’abajandarume b’u Rwanda, bakabwira abajandarume ngo bareke abaturage bamusuhuze.”

Nzamwita avuga ko uwo munsi abasirikare bamubujije kwicara ku marembo y’ikigo nk’uko byari bisanzwe hasigara abasirikare ba Gaddaffi n’aba Habyarimana bacungaga umutekano.

Gaddaffi amaze kwinjira mu kigo mu ikanzu y’ikigina, yatemberejwe mu mashuri arangije ajya mu musigiti gusali (gusenga) aba ari na we uyobora uwo muhango.

Ati “Uwo munsi niwe wasarishije Ijuma. Ni we watanze inyigisho. Habyarimana na we yaraje asuhuza abantu bari hano bose. Ijuma yarangiye saa saba. Bamwe barataha abandi barasigara.”

Mbarushimana avuga ko muri urwo ruzinduo, Gaddaffi yacurangiwe na Orchestre Abararungu indirimbo zirata ishyaka MRND ryari ku butegetsi ndetse na Jamahiriyah ya Gaddaffi.

Ati “Bari bakoze indirimbo irimo n’icyarabu, bavuga ishyaka rya MRND ryari ririho icyo gihe bakaririmba n’ishyaka rye muri Libya. Bakoreshaga ijambo ry’icyarabu rivuga ngo ‘Ramba’ bakarivuga ngo Jamahiriyah fadiha.”

Nyuma yo kuva mu Rwanda, Gaddaffi yateye inkunga iyubakwa ry’umuhanda uva ku Kimisagara ugera kuri icyo kigo.

Libya kandi yari ifite imigabane muri Hotel Méridien ndetse no mu ruganda rwakoraga inkweto n’ibikomoka ku ruhu ruzwi nka Sodeparar.

Gaddafi ajya kwicwa mu 2011, umubano w’igihugu cye n’u Rwanda wasaga n’utameze neza. Impamvu ya mbere ni uko ahagana mu 2010, Polisi y’u Rwanda yatahuye ko hari intwaro muri Ambasade ya Libya mu Rwanda zashoboraga kwifashishwa mu bikorwa bimwe na bimwe byo gutera ama-grenade mu Mujyi wa Kigali.

https://igihe.com/amakuru/mu-mateka/article/ibyo-utamenye-ku-ruzinduko-rwa-gaddafi-mu-rwanda-rwasize-yandagaje-mobutu-wa