Urugereko rw’Urukiko Rukuru rwo mu Rwanda ruburanisha imanza z’iterabwoba n’izambukiranya imipaka rwasubitse urubanza rwa Bwana Paul Rusesabagina n’abo bareganwa 20, nyuma y’aho agaragaye mu rukiko atunganiwe. Rusesabagina yasabye ko urubanza rwasubikwa kuko umwunganizi we Me Rudakemwa Jean Felix yabuze mu rukiko atavuze impamvu.
Ubwo hasubukurwaga urubanza rwa Rusesabagina n’abo bareganwa kuri uyu wa kane, Bwana Paul Rusesabagina yagaragaye mu rukiko atunganiwe. Yari amaze iminsi yunganirwa na me Rudakemwa Jean Felix kuko undi mwunganizi we Me Gatera Gashabana yavuze ko yagiye mu rundi rubanza Arusha akazagaruka taliki 24 z’ukwezi kwa gatatu.
Rusesabagina yabwiye urukiko ko urubanza rwasubikwa kubera ko umwunganira mu mategeko atabonetse, avuga ko iburanisha rikomeje atunganiwe haba hari uburenganzira yimwe. Yagize ati: “Twumvaga tutaburana mu gihe hari icyemezo cyafashwe ejo tutishimiye kandi twajuririye”. Yumvikanishije ko we n’umwunganizi we babyumvikanyeho, ko ahubwo bari bafite gahunda yo guhura
Iki kifuzo cya Rusesabagina cyakuruye impaka mu rukuko, ubushinjacyaha buvuga ko ibisobanuro Rusesabagina yahaye urukiko nta shingiro bifite kuko busanga umunyamategeko umwunganira azi neza ko kutishimira icyemezo cyafashwe bidahagarika urubanza.
Bongeyeho ko kuba Me Felix Rudakemwa afata umwanzuro wo kutitabira iburanisha yagaragaje kutubaha urukiko ariko buvuga ko Rusesabagina ataburana atunganiwe busaba nabwo ko urubanza rwasubikwa.
Abandi baburanyi basabye ko nubwo uwunganirwa afite uburenganzira bwo kunganirwa, ariko n’abandi bahora basubukirwa urubanza na bo uburenganzira bwabo butubahirirzwa.
Me Rugeyo Jean wunganira bamwe mu bareganwa na Rusesabagina yasabye urukiko ko kubera ubwinshi bw’ababuranyi, abarebwa n’iki kibazo bose bashyirirwaho gahunda bakurikiza mu rubanza.
Me Nkundabarashi moise wunganira Callixte Alias Sankara we yasabye urukiko kwita ku gihe urubanza rwabo rumaze bakaburanishwa.
Izi mpaka zasojwe n’umwanzuro urukiko rwafashe wo gusubika urubanza rukimurirwa ku munsi w’ejo 12 z’ukwezi kwa gatatu, urukiko rusaba ababuranyi bose kuzitabira iburanisha.