Urukiko rwisumbuye rwa Nyarugenge ruherereye i Nyamirambo, ku mugoroba wo kuwa Mbere tariki 20 Gashyantare 2017 rwari rwategetse ko Evode Imena uburanishwa ku byaha by’itonesha mu mutungo wa leta, gutanga inyandiko ku badakwiye kuzihabwa ndetse n’inyandiko mpimbano, yaba afunguwe by’agateganyo agakurikiranwa ari hanze, ariko ubushinjacyaha bujurira mu rukiko rukuru busaba ko yakomeza gufungwa akaburana ari muri gereza.
Kuri uyu wa Kane tariki 16 Werurwe 2017, urukiko Rukuru rwasomye imyanzuro y’urubanza rw’ubujurire bwari bwatanzwe n’Ubushinjacyaha, maze rutegeka ko Evode Imena akomeza kuburana ari hanze. Uru Rukiko rukuru rwagaragaje ko ubujurire bwatanzwe n’ubushinjacyaha nta gaciro bufite.
Evode Imena watawe muri yombi kuwa Gatanu tariki 27 Mutarama 2017, akaba aregwa hamwe n’abandi bagabo babiri bakoranaga, ari bo Kayumba Francis na Kagabo Jacques. Aba bose bakoranaga muri Minisiteri y’Umutungo Kamere (MINIRENA) mu gihe Evode Imena yari Umunyamabanga wa Leta ushinzwe Ubucukuzi bw’amabuye y’agaciro muri Ministeri y’Ubutaka, amashyamba n’umutungo kamere. Aba bombi kandi n’urukiko rukuru rwategetse ko bakomeza kuburana bafunzwe.Kimwe mu byagaragajwe n’ubushinjacyaha tariki 15 Gashyantare 2017, ni uko mu byaha Evode Imena aregwa, harimo ko mu gihe yakoraga muri MINIRENA hari ahantu mu karere ka Gasabo uyu Kagabo Jacques bakoranaga yamenye ko hari amabuye y’agaciro, akabwira umugore we n’uwa Kayumba Francis ko bashinga kompanyi ikazahabwa isoko ryo kuyacukura, kandi bo bakaba barabifashijwemo na Imena Evode wasinye iteka ryemera ko iyo kompanyi ihabwa iryo soko kandi abizi neza ko ari iy’abagore b’abagabo bakorana.
Evode kandi ubushinjacyaha bwavuze ko umuyobozi wa RNRA (Ikigo cy’Igihugu gishinzwe umutungo kamere) yamwandikiye amumenyesha ko iyo kompanyi yahawe isoko mu buryo butemewe n’amategeko hanyuma undi akamusuzugura.
Gusa Evode Imena ibyaha byose aregwa yarabihakanye avuga ko nta na kimwe yigeze akora, ari naho yahereye asaba ubushinjacyaha ko bwamugira umwere ndetse bukamurekura akajya mu muryango we. Aha ninaho yari yavugiye amagambo yatumye abo mu muryango we bimyoza abandi bararira. Evode Imena ati: “Ibyaha nkurikiranyweho nta na kimwe nakoze mu nyungu zanjye. CID nijyanyeyo bampamagaye… Aho ntuye harazwi. Mfite uruhinja rw’ukwezi n’igice, Mwanyemereye nkajya mu rugo.”
Nyuma y’ubu busabe bwe, urukiko rwanzuye ko afungurwa agakomeza gukurikiranwa ari hanze ariko abandi bari kumwe na we bo bagakomeza gufungwa iminsi 30 y’agateganyo mbere y’uko urubanza rwabo ruburanishwa mu mizi. Imyanzuro y’urukiko kandi yasomwe abaregwa bose nta n’umwe uhari.
Ukwezi.com
