Komisiyo y’Igihugu y’Amatora yatangaje ko kuri uyu wa Kabiri iri bwakira kandidatire ya Diane Shima Rwigara ushaka kwiyamamariza umwanya w’Umukuru w’Igihugu.
Izi kandidatire zirakirwa nyuma yaho Dr Frank Habineza na Mwenedata Gilbert babimburiye abandi ku wa 16 Kamena 2017. Ibyangombwa Habineza yashyikirije Komisiyo y’Igihugu y’Amatora birimo icyemezo cy’amavuko, icy’ubwenegihugu, ikigaragaza ko yasubije ubwenegihugu bundi yari afite, icyangombwa cyo gutura n’ibindi biteganywa n’itegeko.
Nyuma yo gusuzuma ibyangombwa byose bya Dr Habineza, Perezida wa Komisiyo y’Igihugu y’Amatora, Prof Kalisa Mbanda, yasanze ikiburamo ari fotokopi y’ikarita y’itora, asabwa nayo kuyitanga.
Undi ushaka kuba umukandida wakiriwe ni Mwenedata Gilbert na we watanze ibyangombwa bye, harimo n’urutonde rw’abantu basaga 600 bamusinyiye ngo abashe kwiyamamaza nk’umukandida wigenga.
Uwitwa Barafinda Sekikubo Fred utuye i Kanombe, na we watanze kandidatire ye mu ba mbere ariko asabwa kujya kuzana ibyangombwa birimo imikono y’abamusinyiye n’ibindi.
Gutangaza lisiti ntakuka y’abakandida bemejwe bizakorwa ku wa 7 Nyakanga 2017 mu gihe kwakira kandidatire byatangiye kuri uyu wa 12 Kamena bikazarangira ku wa 23 Kamena 2017.
Itora rya Perezida wa Repubulika rizaba kuwa 3 Kanama ku Banyarwanda bari mu mahanga no kuwa 4 ku Banyarwanda bari imbere mu gihugu.
Igihe.com