Umwana wa Idamange Iryamugwiza yabonetse. Amakuru Ijwi ry’Amerika ikesha Idamange Iryamugwiza Yvonne, aremeza ko umwana we w’umuhungu w’inyaka 16 utaraye mu rugo amaze kuhagera.
Mu kiganiro mu gitondo cy’uyu wa kane, Idamange yavuze ko umwana we wari wamubwiye ko araye muri stade kubera ko yarenze ku mabwiriza yo kubahirizwa mu bihe cyo kwirinda Covid-19, yamuhamagaye kuri telefoni amubwira ko agiye kugaruka mu rugo.
Avugana n’Ijwi ry’Amerika yagize ati: “ Umwana ndamubaza aho yaraye ntansubize ahubwo akarira. Ndabona afite ubwoba. Namuretse ngo abanze aryame aruhuke”.
Mu ijoro ryo kuri uyu wa gatatu ni bwo Mme Idamange yatabaje, avuga ko umwana we “utari ufite akamenyero ko gusohoka mu rugo atavuze”, yamushatse akamubura.
Mme Idamange Iryamugwiza Yvonne ni umunyarwandakazi umaze kumenyekana kubera videwo ashyira ku mbuga nkoranyambaga avuga ku bibazo bimwe na bimwe biri mu Rwanda.
Ikiganiro cyose kuri iyi nkuru, kirahita ku Ijwi ry’Amerika-Iwanyu mu Ntara, i saa saba ku isaha yo mu Rwanda no mu Burundi
