Umuyobozi wa sosiyete yatwaraga abagenzi Kigali-Huye-Rusizi ya Sotra Tours yatawe murio yombi, nyuma gato y’uko iyi sosiyete yamburiwe uburenganzira bwo gukorera mu Rwanda.
Umuvugizi wa Polisi mu Mujyi wa Kigali SP Hitayezu Emmanuel, amaze kubwira Ikinyamakuru Izuba Rirashe ko Cyimana Thierry Kayitankore afungiye kuri Sitasiyo ya Polisi ya Kicukiro.
SP Hitayezu avuga ko Cyimana akurikiranyweho gukora inyandiko mpimbano nubwo yirinze kubwira iki kinyamakuru izo nyandiko izo ari zo. Yatawe muri yombi kuri uyu wa Gatatu tariki 25 Gicurasi 2016.
Kuri uyu wa Gatatu abashoferi bakoreraga Sotra Tours, bari babwiye iki kinyamakuru ko batazi aho aherereye, bakavuga ko bakeka ko yatawe muri yombi kugira ngo adateza akavuyo kuko Sotra yafunzwe, igahita isimburwa na Alpha Express ya bamwe mu bari basanzwe ari abanyamigabane ba Sotra.
Gusa Umuvugizi wa Polisi mu Mujyi wa Kigali, SP Hitayezu Emmanuel, avuga ko ibyatumye Cyimana atabwa muri yombi nta sano bifitanye n’ibibazo by’ifungwa rya SOTRA.
Ati “Icyaha afungiye ntaho gihuriye no kuba agence ya Sotra yafunzwe. Ni ibindi bindi akurikiranyweho, bijyanye n’impapuro mpimbano ariko kubihuza n’icyo cyo kubihuza no kuba Sotra yafunzwe ntaho bihurira.”
Yakomeje agira ati “Icyo nababwira ni uko tukiri mu iperereza, ubwo haje kugaragara ko hari aho byahurira twazabibamenyesha.
Mu ntangirizo z’iki cyumweru Ikigo Ngenzuramikorere y’Imirimo imwe n’imwe ifitiye igihugu akamaro cyahagaritse uburenganzira bwa Sotra bwo gutwara abagenzi kubera kurenga ku mategeko.
Soma: SOTRA Tours yahagaritswe gutwara abagenzi aho yakoreraga hose mu gihugu
Nyuma yaho aho yakoraga ingendo hahise hegurirwa sosiyete nshya ya Alpha Express igizwe n’abahoze ari abanyamigabane ba SOTRA, umwe mu bayigize akemeza ko koko Sotra yarimo ibibazo by’imicungire, mu gihe hari abandi bavuga ko Sotra ishobora kuba yaragambaniwe.
Soma: Amayobera mu ihagarikwa rya Sotra Tours: Hari abavuga ko ‘yagambaniwe’
Source: Izuba Rirashe
