Umunyamakuru Jean Bertrand Niwejambo wa Radio Hot FM aravuga yakubitiwe mu kabari kari mu mujyi wa Kigali rwagati kazwi nka ’Fantastic’ akanamburwa ibikoresho bye by’akazi, ibyangombwa n’amadolari ya Amerika arenga 700.
Mu masaha ya mugitondo cyo kuri uyu wa Gatandatu tariki 9 Nyakanga 2016, nibwo ikinyamakuru Ukwezi.com cyaganiriye n’umunyamakuru Jean Bertrand Niwejambo, aduhamiriza ko mu ijoro ryo kuri uyu wa Gatanu yakubitiwe muri Fantastic bakamugira intere ubwo yajyagayo gutohoza inkuru ijyanye n’uburyo aka kabari gaha ikaze abana batujuje imyaka y’ubukure ndetse n’ubucukumbuzi ku nzira y’icyaha cy’icuruzwa ry’abantu.
Jean Bertrand avuga ko uretse kuba yakubiswe n’abakozi b’aka kabari, yanambuye ibikoresho by’akazi birimo akuma gafata amajwi, hamwe n’ibyangombwa bye byose ndetse n’amadolari 733 yari afite mu mufuka. Yazindutse ajya gutanga ikirego kuri Polisi aho asaba ko ikibazo cy’ihohoterwa yakorewe cyakurikiranwa akarenganurwa, akavuzwa akanasubizwa ibyo yambuwe.
Ikinyamakuru Ukwezi.com cyagerageje kuvugana n’umuyobozi wa Fantastic ku murongo wa telefone ariko ama nimero abiri akoresha nta n’imwe yari iri ku murongo, tukaba dukomeza kubakurikiranira iby’iyi nkuru.
Ukwezi.com