Uganda Airlines mu rugendo rwayo rwa mbere nyuma y’imyaka 18 yahagurukanye abagenzi 8.
Kuri uyu wa gatatu, indege ya Uganda Airlines yakoze urugendo rwayo rwa mbere rw’akazi, yahagurutse i Kampala yerekaza i Nairobi irimo abantu umunani nk’uko bivugwa n’ikinyamkauru Monitor cyo muri Uganda.
Ejo ku wa kabiri, Uganda yakoze umuhango wo kumurika iyi kompanyi y’indege y’igihugu, nyuma y’imyaka 18 yari ishize idakora.
Urugendo rwayo rwa mbere – rw’umuhango wo kongera kuyibyutsa rwakozwe n’indege yo mu bwoko bwa Bombardier CRJ900 – narwo rwavuye i Kampala rwerekeza kuri Jomo Kenyatta International Airport i Nairobi.
Ni urugendo rwamaze hafi iminota 45. Urugendo rw’uyu munsi narwo iyi ndege yarushoje neza.
- Afrika y’Epfo yafashe indege ya Air Tanzania
- Indege yagonze inyoni irahanuka abantu barakomereka
- Boeing igomba kwishyura miliyari $5 kubera 737 Max
Urwo rugendo rw’ejo ku wa kabiri, ku ikubitiro rwari ruteganyijwe gutangira ku isaha ya saa tanu n’iminota 10 z’amanywa ku isaha yo muri Uganda, rwakerereweho isaha imwe.
Abagenzi bari muri iyo ndege ahanini bari abategetsi bo muri leta ya Uganda ndetse n’abanyamakuru.
Iyi kompanyi ije isanga izindi zikorera muri aka karere nka Ethiopian Airlines, Kenya Airways, RwandAir na Air Tanzania. Izi ndege nyinshi zijya mu byerekezo bimwe.
Bamwe bibaza ku bushobozi bw’izi ndege bwo kubona abagenzi bahagije no kunguka kwazo.
Uganda Airlines mu itangizwa ryayo, leta yavuze ko yizeye ko izabona abagenzi no kunguka kuko Abanya-Uganda bagenda ari benshi kandi bategaga indege z’abandi none ubu bafite iyabo.
Abanya-Uganda bishimiye kongera gukora kwa kompanyi y’igihugu y’indege, ariko bagaragaza n’amakenga bibaza niba izakora neza.
Iyi kompanyi yari yarafunze imiryango kubera kumara imyaka icungwa nabi, ruswa ndetse n’ifatirwa ry’imitungo yayo ikagurishwa ubwo byari bimaze kugaragara ko ubukungu bwayo bucumbagira.
https://www.bbc.com/gahuza/amakuru-49493525
