Shema w’imyaka 20 yasinye imyaka ibiri mu ikipe yo muri Amerika yitwa Florida Gulf Coast Eagles

Kuri uyu wa Mbere tariki 19 Ugushyingo 2018 nibwo Kaminuza ya Florida Gulf Coast yatangaje ko yahaye ishuri umukinnyi w’Umunyarwanda Shema Osborn w’imyaka 20 inamuha amasezerano nk’umukinnyi w’ikipe yayo.

Uyu mukinnyi yamenyekanye mu myitozo ya Giants of Africa mu 2015 bituma abona umwanya muri ‘Glove Prep Christian Academy’, ishuri ryo muri Amerika yagiye mu 2016 anakina Basketball.

Mu mpeshyi y’uwo mwaka Shema yahamagawe mu Ikipe y’Igihugu y’u Rwanda yakinnye igikombe cya Afurika cy’abatarengeje imyaka 18 cyabereye i Kigali.

Nyuma yo kwitwara neza mu ikipe y’ishuri rye mu myaka ibiri yarikiniye yahise abona amasezerano yo gukina mu ikipe ya kaminuza ya Florida Gulf Coast Eagles BBC ikina muri shampiyona ya kaminuza mu cyerekezo cy’Amajyepfo ‘Atlantic Sun Conference’ kuko shampiyona ya kaminuza muri Amerika ikinwa mu byerekezo bine aho kuba bibiri nkuko bisanzwe muri NBA.

Iyi kipe yasinyishije Shema yakirira imikino yayo kuri Alico Arena, ijyamo abantu ibihumbi 11.

Shema Osborn yasinye imyaka ibiri muri Florida Gulf Coast Eagles BBC

Shema agiye kujya akinira imikino muri Alico Arena

Yari mu bakinnyi bakinnye Afrobasket y’abatarengeje imyaka 18 yabereye mu Rwanda mu 2016