Rwatubyaye wa APR FC yihanangirijwe gukuramo umudari nyuma yo gutsindwa – VIDEO

Myugariro wa APR FC Rwatubyaye Abdul yasabwe gusubizamo umudari yari amaze kwambikwa nyuma y’aho yagaragaraga nk’utishimye ubwo ikipe ye yatsindwaga ku mukino wa nyuma w’igikombe cy’Amahoro.
Mu gihe APR FC yambwikwaga imidari nk’iyegukanye umwanya wa kabiri muri iri rushanwa, Rwatubyaye wari ukibabajwe no gutsindwa yambuye umudari yari amaze kwambikwa maze Perezida wa APR FC, Maj. Gen. Jacques Musemakweli amusaba kongera kuwambara.
Mu mashusho yafashwe n’umunyamakuru wacu Faustin Niyigena, ku isengomnda rya 34 nibwo hagaragara uyu myugariro unasanzwe akinira ikipe y’igihugu Amavubi yambikwa umudari na Perezida w’Ishyirahamwe ry’Umupira w’Amaguru mu Rwanda (FERWAFA), Nzamwita Vincent De Gaulle maze agahita awukuramo, ariko yagera imbere ya Maj. Gen. Musemakweli agasabwa kuwusubizamo.

Si Rwatubyaye wenyine gusa wagaragaye akuramo umudari yari amaze kwambikwa kuko hari n’abandi barimo Bizimana Djihad bayikuyemo maze bagasabwa kongera kuyambara.

Aha Rwatubyaye yakuragamo umudari yari amaze kwambikwa n’umuyobozi wa FERWAFA, Nzamwita Vincent De Gaulle (Screenshot)

Twagerageje kuvugana n’uyu mukinnyi mu gitondo cyo kuri uyu wa Kabiri kugira agire icyo atangaza kuri iyi myitwarire ijya igaragara ku bakinnyi bamwe na bamwe, ariko umurongo we wa telefone ntiwabonekaga kugeza ubwo twandikaga iyi nkuru.
APR FC yatsinzwe igitego 1-0 na mukeba wayo mukuru, Rayon Sports ku mukino wa nyuma w’igikombe cy’Amahoro cyo muri uyu mwaka wa 2016 wakinwe kuwa Mbere tariki 4 Nyakanga umunsi u Rwanda rwizihiza kwibohora.

Source: Izuba Rirashe