Mukundwa Sandrine uzwi muri filime Star in Love akeneye ubufasha bwo kwivuza Cancer yo mu myanya myibarukiro
Mukundwa Sandrine ni umukobwa w’imyaka 25 y’amavuko, akaba ari umukinnyi wa filime wamenyekanye muri filime Star In Love yakinanye n’abakinnyi barimo Platini na TMC bo muri Dream Boys ndetse na filime Bye Bye Anita yakinanye na Bisangwa Ben Nganji.
Sandrine afite ikibazo cy’indwara ya Cancer ifata mu myanya myibarukiro izwi ku izina rya Vulvar Carcinomas, akaba yarananiwe n’abaganga bo mu Rwanda bakamwohereza mu gihugu cy’u Buhinde ariho babona babasha kumuvura iyi ndwara, bityo akaba akeneye ubufasha bwo kubasha kubona amafaranga agera ku bihumbi 14,500 by’amadolari y’abanyamerika ngo abashe kwivuza.
Filime Star In Love na Bayi Bayi Anita, Sandrine yakinnyemo
Mu kiganiro n’umunyamakuru wa Inyarwanda.com bagiranye kuri telefoni, mu ijwi ryuzuyemo intege ncye z’uburwayi Sandrine yavuze ko amaze igihe kigera ku mezi 6 amenye ko arwaye ubu burwayi. Sandrine yakomeje agira ati, “nagiye ku bitaro bya Butaro bambwira ko nta kintu bankorera ko ngomba kujya kwivuriza mu Buhinde. Kugeza ubu iyi cancer iri mu gitsina, ariko bambwiye uko ntinda ariko iri kugenda ifata no ku ruhago.”
Sandrine yakomeje avuga ko ibitaro byo mu Buhinde bavuganye yasanze bizamufata amafaranga agera ku 14,500 by’amadolari ya Amerika ($14,500), ni ukuvuga agera kuri miliyoni 11 z’amafaranga y’u Rwanda.
Nyuma yo gufatwa n’iyi ndwara ni uku Sandrine ameze
Sandrine avuga ko kugeza ubu nta bushobozi afite ku giti cye bwo kuba yajya kwivuza, bityo akaba akeneye ubufasha kugira ngo abone ubu bushobozi. Ukeneye kumugezaho ubufasha wamubona kuri numero ye ya telefoni 0788772729 cyangwa kuri 0788534174 ukaba wamushyikiriza inkunga yawe, cyangwa ukaba wanamuba hafi aho arwariye iwabo I Nyamirambo kuri 40.
Source:
http://inyarwanda.com/articles/show/FilmNews/mukundwa-sandrine-uzwi-muri-filime-star-in-love-akeneye-ubuf-68001.html#prettyPhoto