Ku isaha ya saa ine n’igice, inzu ya Hon. Depite Nkusi Juvenal iri mu kagari ka Rukiri II mu murenge wa Remera mu karere ka Gasabo, yafashwe n’inkongi y’umuriro yahereye mu cyumba kimwe ikwira inzu yose, Polisi ishami rishinzwe kuzimya ntabwo ryabashije kuyizimya.
Ibikoresho byo mu nzu byarimo bigurumana
Iyi nzu ni urugo rwa Hon Nkusi, harimo abana n’umukozi ariko bose ntawagize icyo aba. Ibikoresho byo mu nzu nk’utubati, ameza, intebe n’ibiryamirwa byose byabaye umuyonga.
Umwe mu bana bari mu rugo, yabwiye Umuseke ko umuriro watangiye saa ine n’igice, biturutse ku mashanyarazi. nyuma hatangira ikibazo cy’umuriro, akuraho amashanyarazi mu nzu ariko umuriro uranga ukwira hose.
Nyuma yatabaje ababyeyi be na Polisi ishami rishinzwe kuzimya umuriro ariko bahageze ntacyo babashije kuramira mu byari mu nzu uretse kubasha kuzimya umuriro wari wakwiriye inzu yose.
Hon Nkusi, wari mu gahinda kenshi, yavuze ko nta cyo ashobora gutangaza.
Umuvugizi wa Polisi, ACP Celestin Twahirwa yabwiye Umuseke ko abantu bakwiye kujya bubakisha ibikoresho byuzuje ubuziranenge, cyane mu gushyira amashanyarazi mu nzu, kandi bigakorwa n’ababifitiye ubumenyi badashakisha.
Yavuze ko mu nzu hagomba kuba harimo uburyo amashanyarazi yikuraho igihe umuriro uje ari mwinshi, kandi abantu bakagira ibikoresho bizimya umuriro, ndetse bakitabira kugira ubwishingizi bw’ibyo batunze, ibyo ngo bishobora kugabanya ingaruka mbi ziterwa n’inkongi.
ACP Twahirwa yasabye abaturage kujya batabariza ku gihe, igihe habaye inkongi cyangwa ibyago aho kubanza kwirwanirira.
Abazimya umuriro ntibabashije kugira icyo baramira
Bararwana no kuzimya umuriro
Ibintu byose byabaye umuyonga
Inzu yakongotse yose
Inzu yose yahiye
Nta kindi bari gukora uretse kureba ibyabaye
Hon Nkusi aritegereza ibyabaye ku nzu ye n’agahinda
Ibyari mu nzu byose byakongotse
Uretse zimwe mu mpapuro n’udutabo duke umwana yabashije gusohokana ibindi byahiye
Abantu bari bashungamirije bareba uko bazimya iyo nzu
Hon Nkusi Juvenal usanzwe uyobora PAC mu Nteko Nshingamategeko, aganira n’uwari ukuriye itsinda ry’abapolisi bajimije umuriro
UMUSEKE.RW