Nta mutangabuhamya uzongera gukenerwa mu rubanza rwa Col Byabagamba na Rusagara
| 26-02-2016 – Saa 12:04 na Eric Birori |
Ubwo iburanisha mu rubanza ruregwamo Col Byabagamba na Rusagara rizaba risubukuwe, abaregwa n’ababunganira bazatangira gusesengura ibyavuzwe n’abatangabuhamya bavugiye mu rukiko.
Ni nyuma y’aho uru rubanza rusubitswe kuri uyu wa Gatanu, bitewe n’uko umutangabuhamya Brig Gen Aloys Muganga wari witezwe kuza gushinja Col Tom Byabagamba atabashije kuboneka.
Mu gutangira urubanza wabonaga impande zose ziteguye kuburana ariko Perezida w’Urukiko avuga ko kubera impamvu z’akazi umutangabuhamya wari witezwe atabashije kuboneka.
Icyakora urukiko rwavuze ko abaregwa babishatse abatangabuhamya barekera aho kuza kubashinja, ngo kuko rusanga abahanyuze bahagije.
Abaregwa bahise baba nk’abaguye mu kantu ndetse bagaragaza ko bari biteguye kuburana, bahita basaba urukiko ko niba bishoboka bahabwa gahunda yose y’abatangabuhamya basigaye.
Abaregwa n’abunganizi babo basabye akanya bajya kwiherera ngo bahitemo undi munsi waba ubabereye, maze bagaruka bavuga ko bazabona akanya mu cyumweru gitaha ku itariki 02 Werurwe 2016.
Umutangabuhamya Brig Gen Aloys Muganga bikaba atari ubwa mbere yari kuba ageze mu rukiko, kuko mu iburanisha riheruka nabwo abacamanza bavuze ko amaze kuza kabiri ariko agataha adatanze ubuhamya bwe kubera ko uwanya wabuze.
Bamwe mu basirikare b’abatangabuhamya bamaze kugera mu rukiko gushinja, ni Col David Bukenya, Col Jill Rutaremara, Rtd Col Bosco Mulisa,na Rtd Col Camille Karege.
Col Byabagamba ashinjwa ibyaha birimo guhisha nkana ibimenyetso byagaragaza uwakoze icyaha, gukwirakwiza impuha zigamije kugomesha rubanda no kurwangisha ubutegetsi buriho, igikorwa cyo gusebya Leta ari umuyobozi ndetse no gusuzugura ibirango by’igihugu.
Urubanza ruregwamo Col Byabagamba na (rtd0 Brig Gen Frank Rusagara rwasubitswe
biroriw
http://mobile.igihe.com/amakuru/u-rwanda/article/urubanza-ruregwamo-col-byabagamba-na-frank-rusagara-rwasubitswe
