John Magufuli: Kenyatta, Tshisekedi, Mnangagwa na Ramaphosa i Dodoma kumusezeraho. Abaperezida 10 b’ibihugu bya Africa biteganyijwe ko bagera i Dodoma mu murwa mukuru wa Tanzania ahari kubera umuhango wa leta wo gusezeraho John Magufuli.
Perezida Félix Tshisekedi wa DR Congo na Emmerson Mnangagwa wa Zimbabwe n’abandi bari muri Tanzania gusezera bwa nyuma kuri Magufuli, ku rubuga rwa Jamhuri i Dodoma. Mu ijambo rye Tshisekedi yavuze ko DR Congo iri gusenga kandi yifatanyije n’Abatanzania muri ibi bihe barimo.
Perezida Cyril Ramaphosa wa Africa y’Epfo yavuze ko igihugu cye cyatangiye kwigisha Igiswahili kubera umuhate wa Magufuli kugira ngo uru rurimi rukoreshwe. Magufuli yatabarutse mu cyumweru gishize azize uburwayi bw’umutima, nk’uko byatangajwe na Samia Suluhu Hassan, wahise amusimbura.
His Excellency President @CyrilRamaphosa arrives in Dodoma Airport, United Republic of Tanzania for the official State Funeral of the late President of #Tanzania His Excellency Dr John Pombe Joseph Magufuli taking place at Jamhuri Stadium in Dodoma. pic.twitter.com/BCK3m189K1
— Presidency | South Africa 🇿🇦 (@PresidencyZA) March 22, 2021
Abakuru b’ibihugu birimo Kenya, Zambia, Morocco, Namibia, Malawi na Botswana nabo bari mu bari i Dodoma uyu munsi.
Abandi barimo minisitiri w’intebe w’u Rwanda, visi perezida w’u Burundi, minisitiri w’ububanyi n’amahanga wa Angola n’intumwa z’imiryango y’ibihugu Tanzania ibamo nka SADC na EAC.
Nyuma yo gusezerwaho i Dodoma umurambo wa Magufuli uzajyanwa gusezerwaho muri Zanzibar, na Mwanza mbere yo gusezerwaho bwa nyuma no gushyingurwa aho akomoka hitwa Chato mu majyaruguru ya Tanzania.
Source: BBC