Umuhanga mu iperereza yabwiye urukiko ko Omar al- Bashir wahoze ari Perezida wa Sudani yemera ko yakiriye miliyoni nyinshi z’amadorari yahawe na Arabia Saoudite.
Uyu munsi ku wa mbere, Bwana Bashir yagejejwe imbere y’urukiko ashinjwa ibyaha bya ruswa, ibyaha abamwunganira bavuga ko nta shingiro bifite. Abajijwe aho aba ubu yasetse.
Mu kwezi kwa kane uyu mwaka nibwo uyu mugabo yahiritswe ku butegetsi yari amazeho imyaka 30.
- Igisirikare cya Sudani n’abasivile bemeje gusangira ubutegetsi
- Bashir yagaragaye mu ruhame bwa mbere kuva yahirikwa ku butegetsi
- Bashir yajyanywe muri gereza
Mu kwezi gushize, abashinjacyaha bavuga ko basanze ibifurumba binini cyane by’amafaranga yo mu mahanga bipfunyitse mu magunira abikwamo imbuto iwe mu rugo.
Mu rukiko uyu munsi, Bwana Bashir yari yambaye imyenda yera, yagaragaye ari inyuma y’akazu gafunze, ntabwo yigeze agira icyo avuga kubyo aregwa mu rukiko nk’uko bitangazwa na Reuters.
Yavuze gusa yemeza amazina ye, aranaseka ubwo yari abajijwe aho atuye. Maze agira ati: “nahoze ntuye ku kicaro cy’ingabo none ubu mba muri gereza ya Kobar”.
Ahmed Ali Mohamed umupolisi wakoze iperereza yabwiye urukiko ko Bwana Bashir yemeye ko yakiriye miliyoni 25 z’amadorari ya Amerika azihawe n’igikomangoma Mohammed Bin Salman cya Arabia Saoudite.
Avuga kandi ko uyu mugabo w’imyaka 75 hari andi mafaranga yahawe na kiriya gihugu.
Reuters ivuga ko umunyamategeko wa Bwana Bashir yavuze ko ibi byose biregwa umukiriya we nta makuru cyangwa ikibihamya bifatika bihari.
Bwana Bashir ashinjwa kwakira amafaranga mu buryo butemewe n’amategeko.
Mu kwezi kwa kane, General Abdel Fattah al-Burhan uyoboye inama ya gisirikare yafashe ubutegetsi yavuze ko kwa Bwana Bashir bahasanze miliyoni $113 z’amafaranga yo mu mahanga.
Inama ya gisirikare hamwe n’abahagarariye abasiviri kuwa gatandatu bumvikanye ku masezerano yo gusangira ubutegetsi, nyuma y’amezi mu mvururu n’imyigaragambyo yaguyemo abantu amagana.