Ubutasi bwa USA bwamenye amakuru ko Al Shabab yinjiye muri DRC. Amakuru yatangajwe na CIA avuga ko hagati mu Ugushyingo 2018 hari abarwanyi ba Al Shabab binjiye muri Repubulika iharanira Demukarasi ya Congo bafite umugambi wo kugaba ibitero kuri Ambasade yayo i Kinshasa.
America yifashisha indege mu kugaba ibitero kuri Al -Shabab umutwe ifata nk’uw’iterabwoba urwanira muri Somalia
Ibi byatumye Minisitiri y’ingabo ya USA yohereza ingabo mu bice birimo inyungu za USA muri kiriya gihugu.
Itangazo rya Minisiteri y’ingabo za America rivuga ko hari amakuru yizewe kandi yuzuye avuga ko bariya barwanyi baciye iy’ubutaka bafite intwaro n’amadolari yo kwifashisha mu bitero byabo.
Jeune Afrique yanditse ko ingabo za USA ziri gukorana n’iza DRC mu gucunga umutekano haba kuri Ambasade ya USA n’ahandi hari inyungu za America.
Hari abavuga ko ibi bije kuba ikindi kintu gishobora kuzakoma mu nkokora imigendere myiza y’amatora y’Umukuru w’igihugu azaba muri DRC tariki 23 Ukuboza,2018.
Jean Pierre NIZEYIMANA
UMUSEKE.RW