Kompanyi yo muri Israel ikora ‘software’ (logiciel) y’ubutasi itavugwaho rumwe yongewe ku rutonde rw’umukara rw’ubucuruzi rw’Amerika. Amakuru avuga ko pegasus yakoreshejwe n’ibihugu bitandukanye – birimo n’u Rwanda – mu kwibasira telefone za bamwe mu baharanira uburenganzira bwa muntu, abanyamakuru n’abatavuga rumwe n’ubutegetsi.
U Rwanda rwahakanye gukoresha pegasus. Ubu Amerika yashyize kompanyi NSO Group, ikora iyo ‘software’, ku rutonde rwayo ruzwi nka “entity list” rukorwa na minisiteri y’ubucuruzi, rubuza gukorana ubucuruzi n’abari kuri urwo rutonde.
NSO Group yavuze ko “ibabajwe cyane” n’icyo cyemezo, yongeraho ko ikoranabuhanga ryayo ryafashije kugumana ituze kw’umutekano w’Amerika mu “gukumira iterabwoba n’icyaha”.
Iyo kompanyi imaze igihe ishimangira ko pegasus igurishwa gusa ku nzego za gisirikare, izishinzwe kugenzura iyubahirizwa ry’amategeko no ku nzego z’ubutasi zo mu bihugu bizwiho kubahiriza uburenganzira bwa muntu.
Ariko mu kwezi kwa karindwi uyu mwaka yashinjwe kugurisha ikoranabuhanga ryayo kuri leta z’abanyagitugu, zarikoresheje mu kwibasira abantu b’inzirakarengane.
Mu itangazo yasohoye, NSO Group yagize iti: “Dufite amashyushyu yo kugaragaza amakuru yose ajyanye n’ukuntu dufite uburyo bwa mbere ku isi mu kutajenjeka bwa gahunda zo kubahiriza ibiteganywa mu mikorere n’uburenganzira bwa muntu zishingiye ku ndangagaciro z’Amerika dusangiye cyane, zamaze no gutuma duhagarika imikoranire myinshi n’inzego za leta zakoresheje nabi ibicuruzwa byacu”.
Ariko abategetsi bo muri Amerika bavuze ko NSO Group n’indi kompanyi Candiru yo muri Israel zakoze “zinyuranyije n’umutekano w’igihugu cyangwa inyungu zo mu rwego rw’ububanyi n’amahanga za Leta Zunze Ubumwe [z’Amerika]”.
Ubirebeye inyuma, iki ni icyemezo gitunguranye cya leta y’Amerika.
Amerika na Israel ni inshuti za hafi, inzobere z’ibi bihugu zo mu rwego rw’umutekano wo kuri mudasobwa zagiye zikorana, ntanze nk’urugero, mu guhagarika gahunda ya nikleyeri ya Iran.
Ariko ‘software’ y’ubutasi ya pegasus yo ku rwego rwa gisirikare ikorwa ikanacuruzwa na kompanyi NSO Group yo muri Israel, yagaragaje ko ari intwaro itisukirwa yo kuri mudasobwa, ikoreshwa na bamwe mu bakiliya bayo b’abanyagitugu cyane bo mu burasirazuba bwo hagati mu kwibasira abantu benshi batandukanye, atari gusa abagizi ba nabi n’abakora iterabwoba.
Abanyamakuru bamwe, abanyamategeko, impirimbanyi ziharanira amahoro ndetse na senateri wo mu Bwongereza, bose telefone zabo zigendanwa zashyizwemo mu ibanga iyo ‘software’ ituma umukiliya uyikoresha ashobora gusoma buri butumwa bwose, akagera ku makuru yose yo muri telefone ndetse agashobora gufungura mikoro (microphone) ari kure kandi nyiri telefone ntabimenye.
Mu itangazo, minisiteri y’ubucuruzi y’Amerika yavuze ko icyo cyemezo “gishingiye kuri gihamya yuko ibi bigo byakoze bikanaha ubu buryo bw’ubutasi za leta z’amahanga zakoresheje ibi bikoresho mu buryo bugamije ikibi bwo kwibasira abategetsi muri leta, abanyamakuru, abacuruzi, impirimbanyi, abarimu ba kaminuza n’abakozi bo muri ambasade.
Iyi minisiteri yagize iti: “Ibi bikoresho byanatumye leta zo mu mahanga zikora icecekesha rirenze imipaka y’igihugu, iyi ikaba ari imikorere ya leta z’igitugu yo kwibasira abatavuga rumwe na zo, abanyamakuru n’impirimbanyi baba hanze y’imipaka y’igihugu mu gucecekesha abatavuga rumwe na zo. Imikorere nk’iyo iteje inkeke kuri gahunda y’isi igendera ku mategeko”.
Yanavuze ko ibyo yatangaje biri mu muhate wa Perezida Joe Biden wo “guhagarika kwiyongera kwihuse kw’ibikoresho by’ikoranabuhanga bikoreshwa mu gucecekesha” abatavuga rumwe n’ubutegetsi.
Kompanyi yo mu Burusiya na kompanyi yo muri Singapour (Singapore) – zakoze ibikoresho byo kwinjirira za mudasobwa (hacking) – na zo zongewe kuri urwo rutonde rw’umukara rw’Amerika rwo mu bucuruzi.
Mu yandi makuru, ibiro by’ububanyi n’amahanga by’Amerika byavuze ko bitazafatira ibihano Israel, Uburusiya cyangwa Singapour, hashingiwe ku bikorwa bya za kompanyi ku giti cyazo.