Rwanda: 25 barimo abanyamahanga baregwa gukorana na RNC mu rukiko. Abantu 25 baregwa gukorana n’ishyaka RNC ri tavugarumwe n’ubutegetsi bw’u Rwanda bagejejwe mu rukiko rwa gisirikare i Kigali aho barezwe ibyaha bine.
Mu gusoma imyirondoro yabo mu rukiko bavuze ko harimo Abarundi, Abanya-Uganda n’Abanyarwanda.
Mu banyarwanda higanjemo abakomoka mu karere ka Gisagara.
Bivugwa ko aba ari bamwe mu bafashwe mu mirwano iheruka kubera muri Kivu y’Amajyepfo muri Congo Kinshasa, nta makuru yatanzwe y’uko bagejejwe mu Rwanda.
Muri aba baregwa umuto afite imyaka 18 naho umukuru ni Habib Mudasiru w’imyaka 54 nk’uko umunyamakuru wa BBC uri mu rukiko abivuga.
Bose barezwe ibyaha bine; Kwinjira mu mitwe y’abagizi ba nabi, ubugambanyi bugamije kugirira nabi ubutegetsi, umubano n’ibindi bihugu ugamije gushoza intambara mu gihugu. Barezwe kandi icyaha cyo kurema umutwe w’abagizi ba nabi.
Habib Mudasiru yahoze mu gisirikare cy’u Rwanda ku ipeti rya Majoro, mu kwa gatandatu byavuzwe ko yarasiwe mu mirwano hagati y’ingabo za Congo n’imitwe yitwaje intwaro muri Kivu y’Epfo.
Icyo gihe byavuzwe ko uyu yafashwe akoherezwa mu Rwanda nyuma yo gukomerekera mu mirwano.
Abaregwa bose baje kuburana ifungwa n’ifungurwa ry’agateganyo mu rukiko rwa gisirikare, gusa nta numwe ufite umwunganiye.
Aba baregwa kuba mu mutwe w’ingabo w’ishyaka rya RNC ritavuga rumwe n’ubutegetsi bw’u Rwanda rikorera mu mahanga.
RNC ntacyo iratangaza ku ifatwa n’iburanisha ry’aba bantu.
Ubutegetsi bw’u Rwanda bushinja ishyaka RNC ririmo Gen Kayumba Nyamwasa wahoze ari umugaba w’ingabo z’u Rwanda, kuba ari umutwe w’iterabwoba.
Iri shyaka ryo rivuga ko atari umutwe w’iterabwoba ahubwo ari ishyaka riharanira impinduka mu Rwanda.
Iburanisha ry’aba baregwa rirakomeje….
