Kuri iki Cyumweru tariki 23 Mata 2017, umugabo wo mu karere ka Ngororero yaguye gitumo undi mugabo mugenzi we arimo kumusambanyiriza umugore, kuva ubwo aramukubita kugeza amwishe. Uyu mugabo ubu ari mu maboko ya Polisi aho afunzwe akurikiranyweho icyaha cyo kwica.
Umuvugizi wa Polisi y’u Rwanda mu Ntara y’Uburengerazuba, CIP Theobald Kanamugire, yatangarije ikinyamakuru Ukwezi.com ko ibi byabaye ku isaha ya saa mbiri z’umugoroba wo kuri iki Cyumweru tariki 23 Mata 2017.
Uyu muvugizi wa Polisi avuga ko uwitwa Ngendahayo Daniel yasanze uwitwa Nsabimana Théogène arimo gusambanya umugore we witwa Claudine (Claudine ni umugore wa Daniel), kuva ubwo Daniel yadukira Nsabimana Théogène aramukubita kugeza apfuye. Ibi byabereye mu karere ka Ngororero, mu murenge wa Kabaya, mu kagari ka Ngoma.
CIP Kanamugire yatangarije ikinyamakuru Ukwezi.com ko kugeza ubu Ngendahayo Daniel afungiwe kuri sitasiyo ya Polisi ya Kabaya aho hategerejwe ko azashyikirizwa ubushinjacyaha akaburanishwa ku cyaha cyo kwica akurikiranyweho.
Ukwezi.com
