Kabagire Shaffy, inzobere mu by’isakazamajwi n’isakazamashusho rya radiyo na televiziyo, yapfuye ku gicamunsi cyo kuri iki Cyumweru tariki 5 Kamena 2016 nyuma yo guhanuka mu munara agahita ashiramo umwuka.
Kabagire Shaffy, yari umukozi w’isosiyete isakaza amashusho ya televiziyo ya StarTimes, akaba yakoreraga ku minara iri mu musozi wa Jari mu karere ka Gasabo. Uyu musore kandi yari umuhanga mu by’imirongo ya radiyo na televiziyo, akaba yarakoreye radiyo Voice of Africa ndetse yanafashije cyane TV1 igitangira.
Kabagire Shaffy, yahanutse mu munara uri i Jari kuri iki Cyumweru ubwo yari mu kazi ke ka buri munsi, yikubita hasi umutwe urangirika bimuviramo guhita ashiramo umwuka, iki kikaba ari igihombo gikomeye ku bakoranaga nawe n’abo yajyaga afasha mu kazi ke ka buri munsi.
Amakuru agera ku kinyamakuru Ukwezi.com, avuga ko Kabagire Shaffy yari arimo kwitegura ibirori byo gusoza amasomo y’icyiciro cya kabiri cya Kaminuza mu mezi abiri ari imbere, akaba yari asanzwe yiga muri Kaminuza yigenga ya Kigali.
Mu izina ry’abakunzi n’abasomyi b’ikinyamakuru Ukwezi.com, twihanganishije umuryango wa nyakwigendera tunasabira Kabagire Shaffy kugira iruhuko ridashira.
Ukwezi.com
