Banyarwanda, Banyarwandakazi, Nshutimagara z’u Rwanda dukunda,
Mw’izina ryanjye bwite no mw’izina ry’abagize MTF Inyabutatu, ndabifuriza umwaka mwiza, mushya, muhire wa 2020. Mwese uzababere umwaka w’ubuzima buzira umuze, umwaka w’amahoro n’imigisha by’Uhoraho. Imana ibambike ubugwaneza, ubupfura, umurava n’igikundiro; ibahe kuramba no kuzahinguka imbere yayo murabagirana urukundo.
Reka twese dufatanye gusaba Imana ngo itabare igihugu cyacu, kiri mu maboko y’umukozi mukuru wa lusifero kw’isi, umwicanyi ruharwa, wamaze abantu mu Rwanda no mu karere rutuyemo. Ariko uko imyaka igenda isimburana, ni nako uruhu rugenda rumwikubiraho, abantu benshi barushaho kumenya kamere ye mbi. Ararebana ay’ingwe n’ibihugu duturanye, biryamiye amajanja kubera we; abanyarwanda baramuvumira ku gahera kubera ko ahora abambura utwabo n’ubuzima bwabo, akabategeka bunyamaswa.
Akimara gufata u Rwanda ku ngufu n’iterabwoba, yifubitse itekinika, yari ameze nk’ubumbatiye isi yose mu biganza bye, benshi baramushimagizaga bamufata nka messiah wahagaritse jenoside. Ibigo bikomeye kw’isi byabyiganiraga kumuhundazaho ibikombe, imidali n’amadipolome ahanitse, bamufata nk’ikigirwamana. Hari abemezaga ko umuntu nk’uwo agaragara kw’isi rimwe mu myaka ibihumbi ijana. Erega yatangiye kubyina intsinzi imirambo y’abacu icyandagaye mu gihugu hose kandi adukina ku mubyimba ngo nta wurya umuleti atabanje kumena amagi, ngo nidufungire akababaro kacu mu kabati, ngo abapfuye barapfuye nitumukomere amashyi twemere atuyobore buhumyi uko yishakiye.
Abantu barahuruye bamwoma inyuma kubera ibinyoma bye birenze kure ibya Semuhanuka mubwirwa. Yarabeshye bikomeye ko yahagaritse jenoside, ko indege ya Perezida Yuvenali Habyarimana yahanuwe n’abahutu b’intagondwa, ko we ubwe ari umusirikare w’indashyikirwa utica abana, abagore, abasaza, abakene batazi gusoma no kwandika, abasivili badafite intwaro. Yarabeshye ko akunda demokarasi, ko ashaka gucyura impunzi nyarwanda mu gihugu. Yarabeshye ko ashyigikiye amasezerano y’amahoro ya Arusha. Yabaye umuhanga wo kubeshya kuburyo aho yanyuraga hose, abantu bamiraguraga bunguri ibinyoma bye. Yarabeshye kugeza aho na we ubwe afata ibinyoma bye nk’aho ari ukuri.
Hanyuma se byaje kugenda gute kugirango abantu batangire kumugendera kure nk’uhunga imbwa irwaye ibisazi?
Abakurambere bacu badusigiye igisubizo cy’iryo hurizo: iminsi y’ikinyoma irabaze, ukuri kuratinda ariko ntiguhera, ndetse guca mu ziko ntigushye, guhoraho iteka. Igihe cyarageze rero, ibinyoma bya Paul Kagame bimuhambukiraho, Radio Inyabutatu ivuga akari imurori, abamuzi neza baramutoroka maze ukuri kumera nk’izuba ritamuruye ibicu rigacana uwarugi. Abari baratwawe n’ibinyoma bye, bakorwa n’isoni z’ukuntu bihutiye kubimiragura nk’aho bavutse nta bwonko bafite.
Kumuhunga si ikindi ni uko banga ko yongera kubapfunyikira amazi bagaseba. Erega batahuye ko ari umutekamutwe wo mu rwego rwo hejuru cyane, rwarundi rugerwaho n’abafite impamyabushobozi z’ikirenga zitangwa na Lucifer University. Basanze inseko ye ari nk’iya mahenga; babona intoki ze, zikabibutsa igihe yari acigatiye imbunda ikomeye anyagiza urusoro rw’amasasu mw’isoko muri Byumba arasa ashinyitse yica abagore, abana, abasore n’inkumi, mu kivunge cy’abaturage batamwakuye b’inzirakarengane, ba bandi Diane Rwigara akunda gutabariza.
Abanyarwanda bari mu mashyaka atavuga rumwe na Paul Kagame, iyo batahuye amabi ye bahita bakoma akaruru hejuru bakamwaganira kure. Ba bandi batanguranwaga ibinyoma bye bakabimiragura bunguri ako kanya, basonzeye gusoma inyandiko zisobanura amarorerwa ye. Bazi ko ari umuhanga wo guhisha ubwicanyi bwe, ko akunda kurindagiza abantu abarangaza ngo batamenya ibyo ajunditse, ariko abakurambere bacu badusigiye inyigisho nziza ngo “Ubwenge bwari ikintu iyo butamenywa na bose.” Bitinde bijye kera, amaherezo amabanga y’ibikorwa bye by’urukozasoni ataramenyekana azamenyekana ndetse amwe yatangiye kumenyekana. Abanyarwanda n’abanyahanga bafunguye amatwi n’amaso, bakurikirana buri ntambwe yose ateye. Yigeze gutangaza ko U Rwanda rwatanze impapuro 900 zisaba guta muri yombi abakekwaho Jenoside bakidegembya. Paul Kagame umaze imyaka myinshi yihishe ubutabera muri Village Urugwiro ni we mujenosideri mukuru warukwiye ahubwo gutabwa muri yombi. Ubu isi yose yarangije kumenya ko jenoside imwanditse ku gahanga, ndetse hari abamubona nk’icyorezo cyibasiye akarere kose. Kubera ubwicanyi bwe ndengakamere, agomba kuvanwa ku butegetsi kugirango amahoro agaruke mu Rwanda no mu karere rutuyemo. Nta na rimwe azigera yunamura icumu, ashimishwa no kwica abantu; imyaka yose azamara ku butegetsi ni imyaka y’imivu y’amaraso n’amarira y’amarike. Nk’uko impyisi itunzwe no kurya inyama, Paul Kagame atunzwe no kwica abanyarwanda nk’ibimonyo. Erega, ageze naho yica ababyeyi bawe, maze mu gihe cyo kubashyingura, ugihagaze hejuru y’imva yabo, ukagomba kumushimagiza no kumuvuga ibigwi ngo ataguhambana nabo.
Iyo ibuye ryagaragaye, barikuraho bakarijugunya kure kugirango ritica isuka; kuki Paul Kagame uzwi nk’umwicanyi ruharwa, atavanwaho ngo ubwicanyi bwe buhagarare? Abamukoresha n’abo akoresha, abafatanyije na we ibyaha, reka tubibutse aya mahame: ibikorwa byabo byose Imana irabizi, izabaza buri wese ibimureba ku giti cye bwite, kandi ni yo ifite irya nyuma ridasubirwaho; umwicanyi udatinya Imana akayihekura amanywa n’ijoro, azahabwa ibihano nk’ibya shitani; nta bantu bakwiye kumugirira ishyari, azagira iherezo ribi cyane. Intego y’umwicanyi ruharwa ni ukugirango atazahanwa wenyine, none yashoye abana b’u Rwanda mu mabi ye: ubwicanyi, ibinyoma, ubusambo, urwikekwe, ivanguramoko, ruswa, inzangano, ibiyobyabwenge, ubwibone, ikimenyane, icyenewabo, ubusambanyi, n’ibindi bikorwa by’urukozasoni Imana yanga urunuka. Paul Kagame ntashaka kurimbuka wenyine, agambiriye kujyana ikuzimu igihugu cyose nabishobora. Yabaye nka ya hene mbi yanduza izindi ziyegereye. Abatamugendera kure, bazapfa urwo azapfa.
Ese ko Paul Kagame yagize uruhare rukomeye kandi ruzwi muri jenoside, kuki uyu munsi iyo twumvise ko amaze kwica umuntu uyu n’uyu duhahamuka nk’aho twibwira ko yahindutse? Kuki tumera nk’abatangaye iyo uyu munsi twumvise ko arimo gusenyera ba nyirantabwa? Kuki tumanjirwa iyo uyu munsi twumvise ko agaburira amarozi ibyegera bye? Guhabwa inyito “umwicanyi ruharwa” si ikindi ni uko yayikoreye yivuye inyuma. Nk’uko hari ababohoje amazu y’abandi bakayatwara, Paul Kagame azi ko yabohoje u Rwanda agomba kurutwara, azi ko ari urwe, ashobora kurukoresha icyo yishakiye, ni rwo nzu we yabohoje. Abaturage barwo barurimo ku bushake bwe, abafata nk’amatungo ye, imitungo yabo ni iye, ubuzima bwabo buri mu ntoki ze, ni we ugena ugomba kubaho cyangwa kwicwa. Abo atishe none azabica ejo, bose niwe ubibikiye.
Kureba amabi yose umwicanyi ruharwa akorera abanyarwanda, byatuma umuntu yiheba, yibaza aho umucunguzi azaturuka, ariko ntawe ugomba kwibagirwa ko Imana itajya ibura uko igenza, ifite inzira nyishi cyane, zitabarika. Iyavanye mu cyobo umubyeyi Adeline Mukangemanyi n’umwana we Diane Rwigara, twese ntiyatwibagiwe. Iyakoze biriya n’ibindi izabikora! Uri kumwe n’Imana akabana nayo akaramata, imuha amahoro yayo. Tuyiragije Deo Mushayidi n’izindi nzirakarengane zose ziborera muri gereza hirya no hino mu Rwanda. Turayipfukamiye ngo ivaneho ubutegetsi bwa Sekibi mu Rwanda, ahubwo irwigarurire, ibe umwami warwo ubuziraherezo. Ni yo yonyine ifite byose, ni yo dukeneye, nta wundi mwami dushaka. Aho twicaye twigunze mu mwijima w’icuraburindi, Imana yonyine ni yo yumva imiborogo yacu, ni yo ishobora kudutabara.
Uyu mwaka mushya dutangiye uzabere abanyarwanda bari mu mashyaka atavuga rumwe na Paul Kagame umwaka wo kwisuzuma, kwicisha bugufi, gutahiriza umugozi umwe, kutishyira hejuru, kworoherana no kurangwa n’ukuri. Buri shyaka rizitonde ryisuzume kandi ryitegereze neza abaza barigana; bamwe bashobora kuryinjiramo nyamara barayogoje amahuriro bakoreragamo bigwizaho imitungo iturutse mu nkunga zatanzwe n’abanyamuryango cyangwa baragambaniraga abo bakoranaga kubera umururumba n’izindi ngeso mbi. Birababaje guhunga ubutegetsi bubi bw’umwicanyi ruharwa wagera mu mahanga ugasanga ibisigisigi byabwo muri opposition nyarwanda: kwiyemera kudafite aho gushingiye, kuganzwa n’irari ry’ibintu aho guharanira inyungu rusange za benekanyarwanda bose, gupiganira ubutegetsi n’ibyubahiro naho byagutera gukora amarorerwa, kurangwa n’izindi ngeso mbi zinyuranye n’urukundo. Imana iduhe kuzinukwa ubwibone n’ubusambo, maze turusheho kwitwararika bagenzi bacu no kubakunda, cyane cyane abari mu kaga n’akangaratete.
Mbifurije umwaka muhire mushya wa 2020. Mwese Imana izabahezagire, ibahe kurushaho kuyegera, kuyiha umwanya wa mbere mu mibereho yanyu, kuyikunda kurusha uko mwikunda, no kuyegurira ubuzima bwanyu kugirango irusheho kubambika ubwiza bwayo bubengerana kurusha izuba ry’amanywa y’ihangu. Ndabakunda ariko Imana irushaho kubakunda. Ntawe ukunda bagenzi be atabanje gukunda Imana. Imana ni urukundo, iduhe kurushaho gukundana no kugirana umubano mwiza hagati yacu, turusheho kubana nk’abavandimwe bahetswe n’umubyeyi umwe: Urwanda rwatubyaye!
Yozefu Mutarambirwa
Umukuru wa MTF Inyabutatu
