Amakarito manini 7195 y’itabi ry’uruganda ‘Premier Tobacco Company Ltd’ rw’umuryango wa Rwigara Assinapol, ryatejwe gutezwa cyamunara, rigurwa amafaranga y’u Rwanda miliyoni 512.
Nk’uko Umuhesha w’Inkiko w’umwuga yari yatanze itangazo rya cyamunara ko iri tabi rigurishwa mu gitondo cyo ku wa 28 Werurwe 2018, ni ko byagenze, igiciro fatizo ari 433,727,966 Frw ariko Murado Business LTD yariguze kuri miliyoni 512 Frw.
Iri tabi ryari mu bubiko bw’uruganda i Gikondo muri Parc Industriel, ririmo amoko atanu ari yo Premier Filter (amakarito 5553); Filter Star (amakarito 1033); Filter Star King (amakarito 328); Premier Super Menthol (amakarito 191) na Filter Star Soft (amakarito 90). Buri karito imwe irimo imiti (pieces) y’itabi 5000, ni ukuvuga imiti irengaho miliyoni 35 ku giteranyo cy’amakarito yose.
Anne Rwigaraga na basaza be bari bitabiriye icyamuna bagaragaje ukutishimira amafaranga riguzwe, akavuga ko agaciro karyo kari hafi miliyari y’amafaranga y’u Rwanda.
Anne Rwigaraga yasabye Umuhesha w’inkiko ko yahagarika cyamunara nk’uko biteganywa n’amategeko ko iyo nyir’umutungo atishimiye igiciro ku nshuro ya mbere ya cyamura, ihagarikwa.
Uretse iby’igicoro batishimiye, yanavuze ko bafite urubanza mu rukiko rw’ubucuruzi rwa Nyarugenge ruhagarikisha iyi cyamurana.
Umuhesha w’inkiko w’umwuga watanze itangazo rya cyamunara abisabwe na RRA, Me Habimana Védaste, yabwiye uyu muryango ko cyamunara yabaye mu buryo bwubahirije amategeko, niba utabyishimiye wazitabaza inkiko.
Itabi ryafatiriwe n’ Ikigo cy’Igihugu Gishinzwe Imisoro n’Amahoro (RRA) mu mpera z’umwaka ushize hagamijwe kwishyuza ibirarane by’imisoro bya miliyari esheshatu z’amafaranga y’u Rwanda, byo guhera mu 2012 uruganda ‘Premier Tobacco Company’ rubereyemo leta.
Inkuru irambuye ni mu kanya….
Source: Igihe.com