Sosiyete Atlas Mara y’abaherwe Bob Diamond na Ashish Thakkar, iherutse kugura Banki y’Abaturage na BRD ikazihuriza hamwe muri BPR, yahombye miliyoni 6.7 z’amadorali (5 405 000 000 frws) mu gihembwe cya mbere cy’umwaka wa 2016.
Ubuyobozi bwa Atlas Mara buvuga ko icyo gihombo cyaturutse ku mafaranga menshi yashowe mu bikorwa n’inguzanyo zatanzwe nabi muri Zimbabwe.
Atlas Mara kandi yahombye miliyoni 1.1 y’amadorali mu bihugu nka Nigeria na Zambia bitewe no guta agaciro k’ifaranga.
Iyi banki yashoye miliyoni 51.7 z’amadorali mu kugura banki zitandukanye mu bihugu bya Afurika birimo n’u Rwanda. Mu mezi atatu ya 2016 yinjije miliyoni 51.9%.
- Bob Diamond umwe mu bashinze Atlas Mara Group
Atlas Mara yashinzwe mu 2013. Ifite banki zirimo BankABC yo muri Botswana, Zimbabwe, Mozambique, Tanzania na Zambia, Banque Populaire du Rwanda ndetse ifite imigabane muri Union Bank of Nigeria PLC.
Umuyobozi wayo John Vitalo avuga ko ibiganiro barimo nibitanga umusaruro Atlas Mara ishobora guhuzwa n’ishami rya Afurika ry’ikigo cy’imari cya Barclays PLC .
Mu nama ya WEF Africa 2016, Atlas Mara yatangije gahunda yo kumenyekanisha banki yayo nshyashya ya BPR izaba ikubiyemo BRD na Banki y’Abaturage. Iyi banki ni yo izaba ifite amashami menshi kurusha izindi mu Rwanda.
Source: Imvaho Nshya