Gitwaza ararwana n’ingufu za Shetani atazatsinda! Naze dufatanye kuzirwanyiriza hanze bataramufunga cg ngo yicwe!

Inkundura yo kwegura kw’abapasiteri muri Zion Temple. Nyuma y’aho Pasiteri Fifi Cameron wayobora Zion Temple ku Gisozi, undi muyobozi muri Paruwasi ya Kibagabaga, Pasiteri Kabagema Célestin, yandikiye Apôtre Dr. Paul Gitwaza amumenyesha ko asezeye ku nshingano yari amaranye imyaka ibiri.

Amakuru yo kwegura kwa Pasiteri Kabagema Célestin yashyizwe hanze nyuma y’umunsi umwe Pasiteri Fifi Cameron wayoboraga Paruwasi ya Gisozi, na we atangaje ubwegure bwe.

Igikomeje kwibazwaho na benshi ni uburyo aba bayobozi bafashe icyemezo cyo kwegurira umunsi umwe ndetse n’amabaruwa banditse akaba ahuje amagambo, agatandukanira ku mazina, aho bakoraga ndetse n’imyaka bamaze bahawe inshingano z’ubushumba.

Biravugwa ko Pasiteri Fifi Cameron na Kabagema Célestin atari bo gusa basezeye muri Zion Temple, hari n’abandi bashobora gusezera ku nshingano z’ubushumba mu zindi Paruwasi.

Mu butumwa bahurizaho mu nyandiko zabo bashimira Gitwaza bafata nk’umubyeyi wabo mu by’umwuka.

Abapasiteri ba Zion Temple bamaze gusezera kuri Gitwaza harimo Pasiteri Mazimpaka Hortense wari Umuyobozi wa Zion Temple Karongi, Pasiteri Mugabe Roger wari Umuyobozi wa Zion Temple Paruwasi ya Gisenyi; Umuyobozi w’Urubyiruko Wungirije muri Zion Temple mu Rwanda (wungirije Flory Nzabakira).

Inkubiri y’ubwegure biravugwa ko yaba yanageze mu baririmbyi ba Worship Team ya Azaph.

Abandi bashumba bakomeye muri Zion Temple basa n’abamaze kwitandukanya na yo batarashyira hanze amabaruwa yabo asezera barimo Pasiteri Rusagara, Pasiteri Fred Mulisa, Pasiteri Désiré n’abandi.

Umwuka mubi watangiye gututumba muri Zion Temple mu mezi ashize ubwo humvikanye inkuru zo kutavuga rumwe hagati ya Gitwaza uyobora Zion Temple ku Isi na bamwe mu byegera bye bashinjanya gusebanya, gushaka kwisumbukuruza, ubugambanyi, ubusambanyi n’ibindi.

Byaje kuzamba ubwo tariki 7 Gicurasi 2017, Apôtre Paul Gitwaza yahagarikaga burundu Bishop Bienvenue Kukimunu, Bishop Richard Muya, Bishop Dieudonné Vuningoma, Pasiteri Claude Okitembo Djessa na Pasiteri Patrick Kamanzi mu bikorwa byose by’ivugabutumwa muri Zion Temple ku Isi.

Nta wuragira icyo atangaza yaba Pasiteri Kabagema Celestin cyangwa ubuyobozi bukuru bwa Zion Temple.

Ibaruwa Umuyobozi muri Paruwasi ya Kibagabaga, Pasiteri Kabagema Célestin, yandikiye Apôtre Dr. Paul Gitwaza amumenyesha ko asezeye ku nshingano yari amazeho imyaka ibiri

Igihe.com