Abagore bafungiye muri gereza yabo iri mu karere ka Ngoma ubwo bari basuwe n’umuyobozi mukuru w’urwego rushinzwe imfungwa n’abagororwa kuri uyu wa gatatu bamubwiye ko bifuza ko bajya bagemurirwa nibura rimwe mu cyumweru ngo bakaruhuka ibigori n’ibishyimbo (impungure) bya buri munsi. Uyu muyobozi ariko yababwiye ko bidashoboka kuko ibyo kugemura ibiryo muri gereza biteza akajagari.
Bamwe mu bagore bafungiye muri gereza ya Ngoma kuri uyu wa gatatu baje kwakira umuyobozi w’urwego rubashinzwe
Ubwo bari bahawe umwanya ngo babaze Komiseri Mukuru w’urwego rushinzwe imfungwa n’abagororwa George Rwigamba ibibazo bafite bavuze ko kuba batemererwa kugemurirwa na rimwe bibabangamiye cyane kuko bituma barya indyo imwe gusa.
Umwe muri aba bagore bafunze ati “Nonese ko mutubwiye ngo mugiye gusaba imiryango yacu ige idusura muzajya mureka batuzanire n’ibiryo? Nubundi iyo badusuye nukuza bakatugurira irindazi hano muri kantine (ya gereza) naryo ugasanga ntacyo ritumariye”.
Aba bagore bafungiye ibyaha bitandukanye bavuga ko guhora barya ibigori bibagoye bagasaba ko bakwemererwa kugemurirwa ibindi biryo n’imiryango yabo (gutekera muri gereza ntibyemewe) nibura rimwe mu cyumweru.
Komeri Mukuru w’urwego rushinzwe imfungwa n’abagororwa mu Rwanda George Rwigamba yavuze ko ibi basaba bidashoboka kuko ngo biteza akavuyo muri gereza, gusa ngo abafite ikibazo cy’uburwayi bo bemererwa kugemurirwa.
Yagize ati “Bitewe n’amabwiriza ntabwo byemewe kugemurirwa kuko nukwanga akajagari muri gereza gusa ufite ikibazo cyihariye nk’uburwayi bwemejwe na muganga hari ifunguro ryihariye agenerwa”.
Imfungwa n’abagororwa basurwa buri wa gatanu gusa ababasura ntibemerewe kugira ikiribwa binjizwa muri gereza.
Iyi gereza y’abagore ya Ngoma ifungiyemo imfungwa z’abagore 723, yo n’iya Nyamagabe nizo gereza ebyiri z’abagore ziri mu Rwanda.
Komiseri wa RCS yabanje kwakirwa n’abacunga gereza
Nyuma yasuye ibice bitandukanye by’iyi gereza bikeneye gusanwa
Abagororwa bakinnye udukino tunyuranye tujyanye n’umuco
Bakoze n’imyiyereko itandukanye mu myamabro irimo n’iyo bikorera muri gereza
Komiseri Mukuru George Rwigamba yavuze ko bidashoboka ko imfungwa n’abagororwa bagemurirwa ibiryo kuko biteza akajagari
Elia BYUKUSENGE
UMUSEKE.RW
