Ibihumbi by’abanya-Cuba bagiye mu myigaragambyo ikomeye kurusha indi yose mu myaka ibarirwa muri za mirongo ishize, bamagana ubutegetsi kuri iki kirwa (cyangwa izinga mu Kirundi). Bigabije imihanda mu mijyi itandukanye irimo n’umurwa mukuru Havana, bavuga bati “Hasi ubutegetsi bw’igitugu”. Mu kubasubiza, igipolisi cyakoresheje imyuka iryana mu maso kinakubita bamwe mu bigaragambya.
Abanya-Cuba barakajwe n’igwa ry’ubukungu, n’ingamba zigabanya ubwisanzure n’uburyo abategetsi bitwaye ku cyorezo cya Covid aho imibare yatumbagiye cyane muri iyi minsi. Abigaragambya barasaba ko gahunda yo gukingira yihutishwa kandi ikagera kuri benshi. Umwaka ushize, ubukungu bwa Cuba bugenzurwa cyane na Leta bwaguyeho 11%, kugwa gukomeye kurusha ikindi gihe mu myaka hafi 20. Cuba izahajwe n’iki cyorezo hamwe n’ibihano bya Amerika.
Abandi bantu ibihumbi nabo bagiye mu mihanda gushyigikira leta nyuma y’uko Perezida abasabye kuri televiziyo kujya kurengera impinduramatwara – akomoza ku yo mu 1959 yashyizeho ubutegetsi bwa gikomunisti. Perezida Miguel Díaz-Canel yavuze ko iyo myigaragambyo ari ubushotoranyi bw’abacanshuro bishyuwe na Amerika ngo bahungabanye Cuba, yizeza “kwihimura kw’impinduramatwara”.
Abandi ibihumbi bari kwigaragambya bashyigikiye leta
Umu-diplomate ukomeye wa Amerika muri Amerika y’Epfo, Julie Chung, yanditse kuri Twitter ati: “Dukurikiranye cyane ‘guhamagarira imirwano’ muri Cuba.” “Twifatanyije n’abaturage ba Cuba mu burenganzira bwabo bwo kujya hamwe mu mahoro. Turasaba ituze kandi turamagana urugomo urwo ari rwo rwose.”
‘Nta bwisanzure buhari’
Iyi myigaragambyo yahereye mu mujyi wa San Antonio de los Baños, mu majyepfo ashyira uburengerazuba bwa Havana, nyuma ikwirakwira mu gihugu hose. Henshi yerekanywe ako kanya iri kuba ku mbuga nkoranyambaga, abigaragambya baririmba indirimbo zamagana ubutegetsi na perezida, basaba impinduka.
Umwe mu bigaragambya wabwiye BBC ko yitwa Alejandro yagize ati: “Uyu ni wo munsi. Turarambiwe. Nta biryo bihari, nta miti, nta bwisanzure. Ntibatureka ngo tubeho. Turananiwe.” Amashusho ku mbuga nkoranyambaga yerekana abameze nk’abashinzwe umutekano bafata bakanakubita bamwe mu bigaragambya.
Bamwe bibasiye imodoka za polisi n’amaguriro y’ubutegetsi
Andi yerekana abigaragambya babirindura imodoka za polisi banasahura amwe mu maduka ya leta agurisha mu mafaranga yo mu mahanga. Benshi aya maduka ni yo baguriramo iby’ibanze ariko ibiciro biri hejuru. Abigaragambya kandi baranenga ubuke bw’inkingo za Covid, mu gihe igihugu kiri kugira abanduye hafi 7,000 buri munsi na 47 bishwe n’iki cyorezo ku cyumweru.
Kuva iki cyorezo cyagera muri Cuba hamaze gutangazwa abarenga 1,500 cyishe.
Bamwe mu bigaragambya baririmbaga indirimbo ya rap na raggaeton yitwa Patria y Vida (“Igihugu n’ubuzima”). Uko yitwa biva ku mvugo yo mu myaka ya 1950 ubwo impinduramatwara yari ikuriwe na Fidel Castro yakuragaho ubutegetsi.
