Site icon Rugali – Amakuru

Bishop w’imyaka 26 yarongoye umukobwa w’imyaka 54 usengera muri Zion Temple yizera ko azabyara nka Sara wo muri Bibiliya — AMAFOTO

Francis Kayiranga
“Kubyara se usibye gutekereza kw’Abanyarwanda, urubyaro ko rutangwa n’Imana hari umuntu wiha urubyaro?” Aya ni amwe mu magambo Bishop Niyomutakirwa Frederic wo mu Itorero Beshan Ministry yatangaje abajijwe niba ategereje urubyaro ku mugore we w’imyaka 54 y’amavuko bambikanye impeta y’urudashira kuri uyu wa Kane.

Bishop Niyomutakirwa Frederic n’umukobwa yihebeye Mukundente Felisita nyuma yo gusezerana mu mategeko ku Murenge wa Kagarama

Bishop Niyomutakirwa w’imyaka 26 y’amavuko, avuga ko amaze imyaka 5 akundana na Mukundente Felesita, kandi akaba yizera ko bazabana akaramata ndetse bakanabyara hungu na kobwa.
Nta mpungenge afite ko umugore we ashobora kuba yaracuze. Yizera ko ubushobozi bwo kubyara akibufite usibye ko atanabyaye ngo nta nka yaba yacitse amabere.
Ati “Njyewe nizera ntashidikanya ko Imana nkorera izampa umwana, kandi n’iyo itanamumpa ntabwo icyo ngicyo cyantandukanya n’uwo nakunze.”
Yunzemo ati “Ari ushatse afite imyaka 15 aba ingumba akamubura (umwana) ari ufite ibiri aba ingumba akamubura, ari n’uwanjye ufite 54 hari igihe namubyara nk’uwa Sarah (umugore wa Aburahamu uvugwa muri Bibiliya wabyaye ageze mu zabukuru).”

Bishop Niyomutakirwa afata ifoto y’urwibutso n’uwamunyuze umutima Mukundente usanzwe asengera mu Itorero rya Zion Temple, Kwa Gitwaza

Iyo uganira na Bishop Niyomutakirwa kuri iyi ngingo, avugana akanyamuneza cyane yumvikanisha ko kuba yarongoye umukobwa ufite imyaka 54 we afite 26 atahisha ko bijya mu itangazamakuru kuko bimuteye ishema.
Yizera ko urukundo ntaho rutashora imizi, bityo ko nta wakagombye gutangazwa no kubona umusore nka we ukiri muto yakundanye n’umugore ufite imyaka ikubye iye inshuro zisaga ebyiri.
Yabwiye Izubarirashe.rw dukesha iyi nkuru ati “Urukundo rutandukanye n’ibindi bintu abana b’abantu batekereza. Njyewe umugore wanjye naramukunze, turasezerana mu buryo bwemewe n’amategeko. Gusaba no gukwa ni Kimironko saa tano ni bwo njyewe nzaba nteye imodoka ku muryango. Gusezerano byo ni Kimisagara ku Musozi w’Ibyiringiro (ku itorero rya Apotre Liliane riherereye munsi yo kwa Mutwe,hamwe n’icyapa cyo ku Ntaraga) reception nanone ni Kimironko….”


 
Umuhango wo gusezerana mu mategeko hagati ya Niyomutakirwa na Mukundente wabereye ku Murenge wa Kagarama mu Karere ka Kicukiro kuri uyu wa Kane tariki 23 Kamena, bikaba biteganyijwe ko  gusezerana imbere y’Imana bizaba kuri uyu wa Gatandatu tariki 25 Kamena.
Iyo abantu bumvise ko kanaka yakundanye n’umuntu umuruta cyane mu myaka, rimwe na rimwe bishyiramo ko akurikiye imitungo ye cyangwa bakumva ko hari ikindi amushakaho kitari urukundo gusa.
Bishop Niyomutakirwa we avuga ko ntacyo akurikiye kuri uyu mukobwa usibye urukundo ruzira uburyarya, kuko ngo  bamenyana uyu mukobwa yari umushomeri n’uyu munsi akaba akiri umushomeri.
Ati “Ntaguciye mu ijambo, njye nta mafaranga nakurikiye, narasenze hazamo Uwiteka, muri iyo myaka tumaranye muzi ari umushomeri, kandi n’ubu ni umushomeri, naba narakurikiye iki se?”

Bishop Niyomutakirwa arahirira kubana ubuzima bwe bwose asigaje kuri iyi Si, na Mukundente Felisita, kuri uyu wa Kane
Mukundente Felicita, ubwo yarahiriraga kubana akaramata na Bishop Frederic



 
 

Bishop Frederic n’umwari avuga ko akunda cyane, Felicita, kuri uyu wa Gatandatu azamusaba anamukwe iwabo Kimironko, hanyuma bakomereze ku rusengero basezerane imbere y’Imana kubana ubuziraherezo.

Source: Ibyishimo.com

Exit mobile version