ARSENAL ITANGIRANYE UMWAKU ITEWE NA VISIT RWANDA MUGIHE KAGAME YAHISEMO KWIGIRA USA

Muri Emirates na KCC, ‘Visit Rwanda’ yabaye intero ku mukino wa mbere wa Arsenal muri Premier League (Amafoto). Abafana ba Arsenal mu mpande zose z’Isi, kuri iki Cyumweru wabaye umunsi udasanzwe ubwo bongeraga kubona mu kibuga ikipe bihebeye, gusa biba akarusho ku Banyarwanda kuko gufungura uyu mwaka wa shampiyona y’u Bwongereza byanatangije ku mugaragaro ubufatanye bw’iyo kipe na ‘Visit Rwanda’ nk’umuterankunga.

Ibyapa bimenyekanisha u Rwanda byari ku kibuga, ndetse imbere muri stade abafana beretswe byinshi ku Rwanda binyuze mu mashusho yanyujijwe kuri televiziyo za rutura ziri imbere muri Emirates Stadium.

Ni umukino witabiriwe n’abakunzi ba Arsenal benshi kuko uretse Abongereza n’abavuye mu bindi bihugu, abaturutse mu rwa Gasabo bari babukereye n’icyizere cyinshi dore ko ikipe yabo muri iyi mpeshyi yiyubatse ikagura abakinnyi bashoboka n’umutoza mushya Unai Emery.

Arsenal FC ariko ntiyahiriwe kuko yatsinzwe na Manchester City ibitego 2-0, icya mbere gitsindwa na Raheem Sterling ku munota wa 14, icya kabiri gitsindwa na Bernardo Silva ku wa 64. Man City ntiyoroshye kuko yatwaye Premier League umwaka ushize n’uduhigo turimo ko yatsinze imikino 32 muri 38 igize umwaka wa shampiyona, igeza ku manota 100 n’ibitego 106.

Uyu ni wo mukino wa mbere Arsenal FC ikinnye muri Premier League idatozwa na Arsène Wenger mu myaka 22 ishize, ukaba n’uwa mbere mu myaka itatu izamara yambara imipira ku kuboko kw’ibumoso handitseho ‘Visit Rwanda’, mu kwereka amahanga u Rwanda nk’icyerekezo cya mbere mu bukerarugendo n’ishoramari mu nzego zose.

Itsinda rihagarariye Ikigo cy’Igihugu cy’Iterambere, RDB ryari muri Emirates Stadium, stade igezweho kuko yatashywe muri Nyakanga 2006, yakira abafana 59 867.

Mbere y’uyu mukino, Umuyobozi Ushinzwe Itumanaho muri RDB, Sanny Ntayombya, yabwiye IGIHE kuri Emirates Stadium ko kuba u Rwanda rwarateye inkunga Arsenal FC, byatumye abayobozi ba RDB batumirwa ndetse bakagenerwa ibyicaro byihariye.

Yagize ati “Turi hano nk’abafatanyabikorwa ba Arsenal, tukabafana ku mukino wa mbere wa shampiyona kandi twatumiwe n’ikipe, dufite n’imyanya yihariye yacu, hari n’abayobozi bacu batumiwe n’ikipe barimo Umuyobozi Mukuru Clare Akamanzi uza kuba yicaranye n’abayobozi bakomeye ba Arsenal mu gice cyagenewe abanyacyubahiro, aho abantu bahicara aba ari abantu ikipe yubashye. Kuba ikipe yaduhaye imyanya y’icyubahiro ni gihamya y’uko ubu bufatanye bwacu na Arsenal bwatangiye neza kandi twizera ko buzakomeza neza.”

Uyu mukino wanakurikiwe n’Abanyarwanda n’abafatanyabikorwa b’u Rwanda, abahagarariye abafana ba Arsenal mu rw’imisozi 1000 n’inshuti z’u Rwanda ndetse n’abantu bageza ba mukerarugendo mu Rwanda, bicaye mu gace bagenewe kiswe Visit Rwanda.

Si mu Bwongereza uyu mukino wakurikiwe gusa, kuko RDB yanateguye uburyo bwo kuwurebera kuri televiziyo za rutura muri Kigali Convention Center.

Ntayombya yakomeje agira ati “Ntabwo ari umukino wa Arsenal gusa ariko ni no kwishimira iterambere u Rwanda rugezeho muri iyi myaka ishize tuvuye mu bihe bibi. Ni ishema ry’abafana ba Arsenal ariko ni n’ishema ry’Abanyarwanda bose kubera ko igihugu cyabo kiri kurebwa cyane mu mahanga yose. Twiyibutse ko shampiyona y’u Bwongereza irebwa n’abantu bagera kuri miliyari ku munsi w’imikino.”

Muri ubu bufatanye bwa Visit Rwanda, biteganywa ko abakinnyi ba Arsenal mu makipe y’abagabo n’abagore bazasura u Rwanda ndetse abatoza bayo bakazakira amahugurwa agamije gushyigikira iterambere ry’umupira mu bagabo n’abagore mu Rwanda.

 

Mbere y’umukino abashinzwe umutekano bareba ko nta kintu umufana yinjije muri stade bitemewe

 

Abafana ba Arsenal bishimiye gutangira umwaka w’imikino, ku nshuro ya mbere mu myaka 22 ishize ikipe yabo idatozwa na Arsene Wenger

 

Umwe mu banyarwanda bagiye muri Emirates Stadium, Albert Rudatsimburwa

 

Intero ni Visit Rwanda!

 

Abafana ba Arsenal bagiye biyongera uko iminota yo gutangira k’umukino yagendaga yegereza

 

Abashinzwe umutekano baba bagenzura ko nta mufana uhutazwa

 

Umuyobozi Mukuru muri RDB Ushinzwe Ubukerarugendo, Belise Kariza nawe ari i Londres

 

Umuyobozi Mukuru wa RDB, Clare Akamanzi yagenewe umwanya w’icyubahiro hamwe n’abayobozi ba Arsenal

 

 

Imbere ya Emirates Stadium mbere y’uko umukino utangira

 

Umunyamakuru wa IGIHE Karirima Aimable mbere y’uko umukino wa Arsenal Vs Man City utangira

 

 

Clare Akamanzi imbere muri Emirates Stadium

 

Abayobozi bahagarariye u Rwanda ku mukino wa Arsenal bari kumwe n’abahagarariye iyo kipe

 

Abafana bageze aho buzura stade, umukino uratangira

 

 

Abanyarwanda bari bambaye imyambaro Arsenal yambara iyo yakiniye ku kibuga cyayo

 

Mu ifoto mbere y’umukino

 

Emirates Stadium mbere y’uko abafana binjira ari benshi

 

Ambasaderi w’u Rwanda mu Bwongereza Yamina Karitanyi hamwe na Belise Kariza Ushinzwe Ubukerarugendo muri RDB

 

Akamanzi yari mu Bwongereza ku mukino wa mbere wa Arsenal mu mwambaro uriho ‘Visit Rwanda’

 

 

Imbere muri Emirates Stadium

 

Ikipe ya Arsenal ifite amateka akomeye, arimo ko mu 2004 yatwaye igikombe cya shampiyona idatsinzwe na rimwe

 

Imbere muri Emirates Stadium, intero ni Visit Rwanda

 

 

 

Emirates Stadium yakira abafana 59 867

 

 

 

Uyu mukino usobanuye byinshi kuri Arsenal no ku banyarwanda

 

 

Abakinnyi ba Arsenal mu mukino hagati bahanganye n’aba Manchester City ifite igikombe cya shampiyona cy’umwaka ushize

 

Abakinnyi ba Arsenal mu mukino hagati bahanganye n’aba Manchester City ifite igikombe cya shampiyona cy’umwaka ushize

 

 

Abafana bari batuje, buri wese ategereje kureba uko umukino urangira

 

Umunyamakuru Karirima wa IGIHE mu kazi muri Emirates Stadium

 

Imbere muri Stade, ibyapa bya Visit Rwanda byagaragaraga ku kibuga

 

Imbere muri Stade, abahagarariye u Rwanda barebye umukino ushyushye

 

Visit Rwanda itatse Emirates Stadium

 

 

 

 

 

 

 

Hano ibitego byari bikiri 0-0

 

 

 

 

 

 

Muri KCC hari abatsindiye kuzajya kureba umukino wa Arsenal

Muri Kigali Convention Centre abafana bari benshi, haba na tombola yatumye babiri babona itike y’indege izabajyana i Londres kureba umukino wa Arsenal, dore ko Ikigo cy’Igihugu cy’Indege, RwandAir, gifite ingendo zijyayo nta handi uhagaze.

Kambanda Ronald umaze imyaka 22 afana Arsenal watomboye itike yo kuzareba umukino wayo izakirira kuri Emirates Stadium yavuze ko inzozi ze zibaye impamo.

Yagize ati “Nishimiye cyane kuzajya kureba umukino w’ikipe nkunda nibereye ku kibuga. Ni ubwa mbere nzaba ndebye umukino wa Arsenal ndi muri stade. Numvaga rimwe mu buzima bwanjye nzajya kureba Arsenal none RDB na Visit Rwanda babimfashijemo.”

Umuyobozi ushinzwe Ibikorwa muri RDB, Hategeka Emmanuel, yatangaje ko ubufatanye na Arsenal hari inyungu nyinshi bizazana mu bukerarugendo bw’igihugu.

Yagize ati “Uyu munsi twagaragaje ko amasezerano twagiranye na Arsenal yatangiye gushyirwa mu bikorwa. Twabikoreye ku mukino watangiye shampiyona, ni byiza ko abafana ba Arsenal baza bakadufasha. Aya masezerano twagiranye na Arsenal si yo yonyine akoreshwa mu kwamamaza igihugu. Ni imwe mu ngamba ariko harimo ibindi bikorwa bikurura ba mukerarugendo. ”

U Rwanda rufite intego ko mu 2024 ruzaba rwinjiza miliyoni 800 z’amadolari avuye mu bukerarugendo.

 

Abafana ba Arsenal berekeza aherekaniwe umukino w’ikipe yabo na Manchester City

 

Abafana barebye uyu mukino bari bariyandikishije ndetse kwinjira aho werekaniwe umuntu yabanzaga kurebwa ko ari ku rutonde

 

 

Amasezerano hagati ya Arsenal n’u Rwanda azamara imyaka itatu

 

Umunyamakuru Athan Tashobya ukorera NewTimes yifotoreza imbere ya Visit Rwanda

 

 

Bayingana David ni we wayoboye uyu muhango wabereye muri KCC

 

Abafana ba Arsenal mu Rwanda bari bafite akanyamuneza mu minota ya mbere y’umukino

 

Umuyobozi ushinzwe Ibikorwa mu Kigo cy’Igihugu cy‘Iterambere (RDB), Hategeka Emmanuel, mu gutangiza ku mugaragaro ubufatanye bwa Arsenal na Visit Rwanda yatagaje ko iyi mikoranire izatanga inyungu nyinshi z’ubukerarugendo

 

 

Abafana ba Arsenal b’ingeri zose barebye umukino w’ikipe bihebeye

 

Abarebeye umukino wa mbere muri KCC bagaragaje ibyishimo by’imikoranire mishya hagati ya Arsenal n’u Rwanda

 

 

 

 

Abafana benshi bari bambaye imyenda iriho amazina y’abakinnyi bakunda, abandi bafite iriho ayabo

 

Abafana ba Arsenal bahurira no mu bikorwa bitandukanye byo gufasha abatishoboye

 

 

Edmund Kagire ukorera The East African ati “Visit Rwanda”

 

 

 

 

 

Umunyamabanga wa Leta muri Minisiteri y’Ububanyi n’Amahanga, Ubutwererane n’Umuryango w’Ibihugu bya Afurika y‘Uburasirazuba, Nduhungirehe Olivier yavuze ko imikoranire hagati y’u Rwanda na Arsenal izatuma abantu bashaka gusura u Rwanda ndetse bizateza imbere ubukerarugendo n’ubukungu bwarwo

 

Umurungi Eva umaze imyaka 11 afana Arsenal, akaba abarizwa muri Rwanda Arsenal Fans Club yatangaje ko yashimishijwe n’imikoranire hagati y’ikipe akunda n’igihugu cyamwibarutse

 

 

 

Bamwe mu bafana ba Arsenal mu Rwanda bafashe ifoto y’urwibutso na Kambanda wegukanye itike yo kuzareba umukino wayo

 

Umuyobozi wa RwandAir, Yvonne Manzi Makolo (ibumoso), yitabiriye igikorwa cyatangiwemo amatike abiri y’indege ku bazareba umukino wa Arsenal i Londres mu Bwongereza

 

Kambanda Ronald (wifurebye ibendera) yatomboye itike yo kuzareba umukino Arsenal izakirira kuri Emirates Stadium

 

 

Iradukunda Yvonne ari mu batomboye umwambaro wa Arsenal abikesha gukoresha cyane imbuga nkoranyambaga

 

Amafoto: Karirima Aimable i Londres, muri Emirates Stadium na Muhizi Serge muri KCC