Gasabo – Isoko rishya ryo ku Mulindi wa Kanombe mu mujyi wa Kigali ryubatse ku muhanda werekeza i Gasogi, ubu niryo ryimuriwemo n’abacuruzaga imyaka mu isoko ryasenywe rya Nyabugogo. Iri soko rirema kuwa kane no ku cyumweru rigahahiramo abaturutse mu mirenge ya Kimironko, Ndera, Remera, Bumbogo, Rusororo, Nyarugunga, Kanombe, Niboye n’ahandi muri turere twa Kicukiro na Gasabo.
Aha usanga bahuze cyane bagura banagurisha za telephone za occasion za macye kuva kuri 3000 kugera nko kuri 20 000Frw ubona telephone
Abaguzi iyo muganira bavuga ko ibiciro byazamutse, abacuruzi nabo bakavuga ko abaguzi babuze ko ifaranga ritakiboneka, ariko bose ubasanga muri iri soko ubona ko rihahirwamo n’abantu b’ingeri zinyuranye cyane cyane abo mu kiciro giciriritse (middle class) n’abandi bafite ubushobozi buto bwo guhaha, ariko benshi.
Iri soko ni inyubako ebyiri imwe y’amagorofa atatu indi y’igorofa imwe, aha ku igorofa imwe ku gice cyo hasi niho harangurizwa imyaka nk’amasaka, ibigori, soya n’ibindi binyampeke.
Igorofa yo ruguru y’inzu eshatu zigeretse ni isoko kugera hejuru, abacururiza hejuru usanga binubira ko abakiliya batabageraho kuko Abanyarwanda bahahira hano ngo bataragira umuco wo kuzamuka za ‘etages’ bajya guhaha, byinshi bakenera ngo babigurira hasi. Aba bacuruzi bakifuza ko hasi haba aho kuranguza gusa.
Abacuruza caguwa muri iri soko bavuga ko icyemezo cyo kuyigabanya cyafashwe na Leta cyatangiye kubagiraho ingaruka kuko ubu iyi myambaro yatangiye kugenda ihenda, abaguzi bakifata. Bakifuza ko kiriya cyemezo cyazashyirwa mu bikorwa gahoro gahoro ntibihutirweho.
Ibiciro by’ibicuruzwa by’ibanze hano byifashe bite:
Mu biribwa;
1Kg y’inyama z’iroti ni 2 500Frw
1Kg y’inyama z’imvange ni 2 000Frw
1Kg y’inyama zo mu nda ni 1 400Frw
1Kg y’ifu ya kawunga Nº1 ni 600Frw
1Kg y’ifu y’akawunga bita Posho ni 500Frw
1Kg cy’isombe isekuye ni 600Frw
Umufungo w’imboga za doodo ni 100 cyangwa 150Frw
Ishu nziza igura hagati ya 200 na 300Frw
1Kg y’umuceri wa Bugarama ni 700Frw
1Kg y’umuceri wa Pakistan ni 750Frw
1Kg y’ibishyimbo ni 500Frw
Imbuto
1Kg y’ibinyomoro ni 1 000Frw
Iseri ryiza ryiza ry’umuneke wa kamaramasenge ni 1 500Frw
1Kg y’intababara (Maracuja) ni 1 000Frw
Mu myenda hacururizwa imyenda iciriritse, umugabo/umusore ashobora kubona ipantaro ya caguwa kuva ku 3 000Frw kugera kuya 10 000Frw, umugore/umukobwa nawe yabona umwenda wa caguwa kuva ku 1 000Frw kugera ku 5 000Frw
Kimwe n’imyenda, ntabwo haba inkweto z’igiciro cyane, inkweto za macye wazibona ku 4 000Frw kugera ku 20 000Frw yaba iza siporo cyangwa izo kuzindukana bakunda kwita ingozi.
Aha barangurira uhasanga n’umunyu w’inka
Aho baranguza ibishyimbo, mu isoko ho bigura ugereranyije 500Frw
Amasaka y’igikoma nayo 1Kg cy’aseye kigura 600Frw
Abaturage usanga baje no kugura Soya yo gutera cyangwa yo kuvana mu ifu y’igikoma
Ibiryo benshi bigurira ngo ni akawunga gatandukanye
Abaturage bahahira aha bemeza ko iyi fu y’ibigori bita kawunga yasimbuye ibijumba ku meza yabo
Igiciro cy’umuceri abaturage bavuga ko cyazamutse abawigondera atari benshi
Ku baturage bo hafi aha bagishigisha ikigage bakanywa n’ikivuge amamera bayagura aha ku Mulindi
Uyu mukecuru baramusukira 15Kg amaze kugura
Hasi aho baranguza amasaka baratunganya ngo akazuba kayumutse neza
Mu gitondo ahagana saa mbili abaguzi ngo ntibaraba benshi harimo bacye
Ibase (basin) y’inyanya igura bitatu, agatebo ni 4000Frw akadobo ni 500Frw
Bati nitwe dufite inyanya nziza hano
Ku Mulindi igitoki nk’iki kigura 3500Frw
Mu mbuto n’imboga hacuruza cyane cyane abagore n’abakobwa
Uyu mukobwa mwiza acuruza imbuto avuga ko abaguzi bataraba benshi kuko bakorera hejuru
Mu myenda, Munyaneza ati biragenda gacye gacye abaguzi ntibaratumenyera
Ku Mulindi hari n’ubuconsho
Acuruza imyenda y’urubyiruko amakabutura meza n’imyenda ya siporo, nawe ngo abaguzi ntibaramenyera iri soko ari benshi
Uyu mucuruzi w’inkweto avuga ko abantu bataramenyera kuzamuka hejuru ngo baze bahahe
Inkweto za’abaciriritse n’abafite ubushobozi buto na 2 000Frw urambara
Arashimira umukiliya inkweto anayimupima ngo bumvikane
Hirya barapima umukiliya utifuje gufotorwa, ipantaro nazo ziraboneka aha ku Mulindi
Hasi ku ruzitiro rw’isoko hari n’abandi baba bahashaka amaramuko bacuruza utuntu tunyuranye nka turiya
1Kg y’akaboga k’iroti ni 2 500Frw
Uyu mucuruzi w’imbonekarimwe avuga ko abaguzi b’inyama batajya bapfa kubura yemeza ko abantu bakunda inyama cyane
Ikinono kiryoshya isombe ngo ntabwo gitinda hano kimwe bakiguhera 800Frw cyangwa 1000Frw no hejuru bitewe n’abagishaka
Isoko ryo ku Mulindi ryubatswe n’ishyirahamwe ry’abacuruzi banyuranye ari nabo ba nyiraryo
Photos © E.Mugunga/Umuseke
Evode MUGUNGA
UMUSEKE.RW