Tanzania : Hagiye kuba imyigaragambyo ikaze yo kwamagana Perezida Magufuli
Ishyaka rya CHADEMA ritavuga rumwe n’ubutegetsi bwa Perezida wa Tanzania, rigiye gukora imyigaragambyo ikaze izaba mu gihugu cyose, iyi myigaragambyo ikazaba igamije kwamagana ubutegetsi bwa Perezida John Pombe Magufuli.
Nk’uko inkuru dukesha ikinyamakuru The Citezen ibivuga, Benson Kigaila ushinzwe guhuza ibikorwa by’ishyaka CHADEMA no gushaka abayoboke bashya, yatangaje ko guhera kuri uyu wa Kabiri hazaba imyigaragambyo yo kwamagana ubutegetsi bw’igitugu bwa Perezida Magufuli bubangamira amahame ya demokarasi.
Kuba Perezida Magufuli arwanya ruswa n’imikorere mibi y’abayobozi muri Tanzania, iri shyaka rivuga ko ribishyigikiye ariko rikaba ritishimira uburyo Perezida Magufuli ari umunyagitugu, akaba yirukana abayobozi mu buryo bwo kubatesha agaciro kandi hirengagijwe amategeko agenda umurimo n’uburenganzira bw’abakozi.
CHADEMA kandi ishinja Perezida Magufuli gushaka kuyobora Tanzania atavugirwamo, aha afata ibyemezo nta rundi rwego rwa Leta ahaye ijambo n’umwanya wo gutanga igitekerezo. Gukora buri kintu uko abyumva atitaye ku bitekerezo by’abandi bayobozi, bavuga ko ari ukubangamira nkana amahame ya demokarasi.
Iri shyaka rivuga ko imyigaragambyo yo kwamagana ubutegetsi bwa Magufuli izahera mu karere ka Kahama igakomereza mu bice byose by’igihugu, bikaba biteganyijwe ko izamara ibyumweru bibiri.
Ukwezi.com
