Kuburizamo ikindi cyunamo. Ndabashuhuje basomyi. Nk’uko bisanzwe bigenda mu cyunamo hari ibikorwa bibi bigenda bikorerwa abatutsi bahonotse jenosidi harimo kubica, urugero wa mubyeyi wiciwe iwe Kicukiro umwaka ushize aho yagaragaye ku mashusho aboshye kdi yishwe, cg kubangiriza ibyabo bikoranwe ubugome nk’uriya wo mu majaruguru ashyira uburengerazuba bw’u Rwanda watemewe inka.
FPR ikunze kuvuga ko bikorwa n’abahutu b’intagodwa batarareka umugambi wabo wa jenosidi. Ubu rero hari n’abandi babibona ukundi, bakemeza ko na FPR ishobora nayo kubikora ngo ikomeze gukamisha jenosidi binyuze mukwerekana ubugome bw’abahutu n’urwango bafitiye abatutsi. Aha niho abahutu n’abatutsi babera akaga kdi kugeza ubu impaka zabo, amahane n’amatiku byabo bikaba bigejeje igihugu mu ngorane zikomeye.
Mu munsi yashize habaye ikintu gikomeye cyabyukije ibyishimo kuri bamwe, bajya mu birori mu gihe abandi bari bazabirannyijwe n’agahinda ndetse n’umujinya wari gukora ishyano.
Icyo kintu nta kindi uretse ifatwa ry’umuvandimwe Callixte wahimbwe Sankara.
Numvise hari abavuga ko byari ibintu by’ibihimbano (mise en scène, nzabigarukaho), hari n’abari bishimiye ko ngo agiye kotswamo imishito, hari n’ababivuze uko babibonye.
Bariya babili bo haruguru barambabaje cyane kuko banyibukije ibibi byinshi, nzi, nabonye cg numvise bituma ntabishimira, banyakire gutyo.
Nibutse ibirori byabaye Rwigema yapfuye, abantu barabyina bahimba n’indirimbo. Numvise ko Habyalimana yapfuye habaye ibirori bikomeye i Kampala n’i Bujumbura. Nigeze kumva abantu bavuye kwica bishimye cyane kubera uwo bari bamaze kwica (un professeur, sinshaka kuvuga icyari kibashimishije kuko hari abo byagiraho ingaruka mbi), hari umuntu wo muryango warambiwe kwihisha yishyira abamwica. Abatamukozeho baje byabaye ngombwa ko bamutaburura ngo barebe ko ariwe.
Hari umucikacumu uzwi cyane mu ntara y’amajepfo kubera kwicana cyane, aho kugirango agaragaze ko yakoze akazi ngo kumugoroba yabungukaga imyenda yahindutse amaraso. Abo bose ubu babaye ibicamuke.
Ninako bimeze kuri bariya bantu bo muri FPR, kubera amaraso ni ibicamuke. Numvise ubuhamya n’ibigwi byinshi by’abahutu n’abatutsi ku buryo nibaza niba aba bavandimwe bacu ari abantu cg ari utunyamaswa-bantu dukunda amaraso. Mu rupfu nta birori birimo, nta munezero. Ariko abahutu n’abatutsi bakomeje kubyinira hejuru y’imva nshyashya, aha ndavuga, ibirori mu gihe imihango yo kwera no kwirabura itaraba.
Nk’uko byavutswe na Bwana Rusesabagina, igihe Callixte ya Komori, ingenza zaramugambaniye, ziramufatisha zimurega gutegura no gukora jenosidi y’abatutsi.
Ati habaye ibiganiro biremereye, kurega imitsi, gukubana, guhangana mu bitekerezo. Ntitwatsindishije amafranga twatsindishije ibitekerezo, kuko amafranga adatsinda ibihe byose. Baje bitwaje akandoyi, ingoyi n’abakarani bo kuyora callixte bakanaga ku ngorofani, nako indege da, bagacyura umuhigo ngo umwami w’u Rwanda n’abantu be bishime.
Umuyobozi w’ingabo zivuga ko zahagaritse jenosidi y’abatusi, ahagarariwe n’umugaba w’izo ngabo n’abandi bakarane ngufu nibo bari bagiye kwemeza ibyaha bya Kalisiti no kumushyikira. Isoni n’ikimwaro kuri bo.
Abanyarwanda twaciye mu bihe bikomeye kdi bibi. Uriya munsi nawo wari mubi, Kalisiti mu biganza bya Kagame! Biragatsindwa, uwo munsi ndawuvumye ntuzigera ubaho ndi…. Byarutwa n’ikindi kibi cyose.
Rusesabagina ati, twe n’inshuti zacu twaburijemo ubwo bugome.
Hari umusaza umwe wigeze gutoroka Habyalimana, aho agarukanye n’inkotanyi nazo ashaka kuzitoroka ziramucakira, ziti: Mzee uwo mukino urashaje.
None rero namwe Nkotanyi bavandimwe uwo mukino urashaje.
Mwagize igihe gihagije cyo kunyuruza abantu, kubahimbira ibyaha bikaze no kubagura amafranga dore imyaka ishize ari 29.
Muhereye kuri Rwigema na bagenzi, mugere ku bana twaboherereje, abahutu n’abatutsi bari mu Rwanda mwishe cg mwicishije amahanga akabaha ibikombe akabataka akabavuga imyato mugahabwa impeta z’ubugwari nako z’ubutwari dawe.
Dore Anyesi Ntamabyaliro wabaye mu ishyaka ryarengeraga abatutsi n’ubwo ntazi ibya nyuma bye yanyururijwe Zambiya, Mushayidi na Mutabazi baraguzwe baranyuruzwa hatitawe ku mategeko mpuzamahanga ahana urucuruzo rw’abantu no kubanyuruza.
None dore mu 2019 hari abantu bakigura, bakinyuruza abantu.
Nabajije abakizwa icyo batekereza ku byabereye mu nyanja y’abahindi nabo bagira bati: ubu FPR na Rubanda- nyarwanda bazamuwe ku musozi Karumeli ngo bacirwe urubanza bamaze guhitishwamo umwami bagomba gukorera: gukorera u Rwanda n’abanyarwanda cg gukorera FPR na Kagame. Abazi bibilia muzandebere ibyo ku musozi karumeli uko byagenze.
Nabonye ijambo ribi cyane ntinya. Biryo ibihano nsabiye FPR n’abayikorera si biriya, ahubwo amategeko y’u Rwanda na Mpuzamahanga niyubahirizwe. Abashinzwe icyo gikorwa bariyizi. Ni abahutu n’abatusi, hamwe, kuko hamwe, cg umwe ku giti cye nibo bayimitse.
Nababwiye ko nta kibi izasiga inyuma kugeza aho ivuga ko umwana warokotse ku bwa burembe yateguye jenosidi. Ni nka bya bindi numvise ko umuvandimwe wa Habyilimana wapfuye muri za 1980 yazezwe muri gacaca, ashinjwa gusahura.
Mutagatifu Matayo 3:10 ati ….ubu intorezo igezwe ku bishyitsi by’ibiti ni uko igiti cyose kitera imbuto nziza kiracibwa kikajugunwa mu muriro.
Imyaka 29 irashije turi kumwe na FPR ,igihe kirageze ngo tuvavanure nayo kdi abatarabikora barakererewe kuko iteka yaciriweho rikomeye kdi ibihano biyitegereje byabara umwanzi.
Mutagatifu Mariko yahanuye uko bizagenda, ndetse yahuje na Magayane, Mc 2:23-29 ati:
Shitani ntishobora kwirukana shitani kdi iyo ubwami bwigabanyije ubwabwo, ubwo bwami ntibubasha kugumaho, inzu iyo yigabanyije ubwayo ntibasha kugumaho cg shitani iyo yihagurukiye , ikigabanya, ntabasha kugumaho, ashiraho.
Nta muntu wabasha kwinjira mu nzu y’umunyamaboko ngo amusahure ibintu atabanje kumuboha kuko aribwo yabona uko asahura inzu ye.
Koko rero FPR yaje ishinja ubutegetsi bwayibanjirije ibyaha n’amakosa menshi, ari ibyo mbona ni uko ari babi inshuro zirenga imyaka bamaze hanze biga ubwo bubisha bityo nta muhutu nta mututsi, shitani ntiyirukana indi naho yaba iyirusha ubukana. (ni ikigereranyo sinatukana nkuze)
Hari ibyo batwigishaga kera ko abadaimoni bakuru bashobora kubererekera abato ariko bibikiye uwo muntu ngo bazamwinjiremo bikubye inshuro nyishi. Nguko uko imyuka mibi yagiye yakuranwa gutura mu banyarwanda kugeza none tukaba tudafite abunamuzi cg abacyashyi b’imyuka.
Ikindi kimenyetso gikomeye ni uko kuva 2/10/1990 umuryango FPR watangiye kuryana no kumarana, bityo warisenye ubura abitoragurira inkwi zo mu itongo cg abihingiramo ibyo babona bikwiranye n’ubutaka.
Koko rero umuvandimwe Mukashema yaravuze ati tube umwe, igihugu ni icyacu.
Koko rero nababwiye kuva kera ko ubumwe bwacu ari yo minyururu yo kubohesha umunyaboka Kagame na FPR kugira tubone uko tubaho mu Rwanda tutikanga ikibi.
Ndababwira nti ubumwe niyo ntwaro Kagame na FPR batinya kdi ni nayo ibakozeho kdi izanabakoraho.
Mube umwe, ubumwe buzana imbaraga naho abadahuza barasamburana bakazana gutsindwa. Aha simvuze ko abantu bahuriza kuri byose ariko hari aho bahurira. Ngo usenya urwe bamutiza umuhoro.
Umugabo ntanze ni Kagame: yafunze umupaka na Uganda akoresha n’ibirori by’uko urujya n’uruza rw’abajya i Burundi rwagabanutseho 70% , none ibihugu birenga 9 byemeje ibintu bikomeye mwabonye.
Ni kuriya ingoma zirangira.
Rimwe ubwo Nyagasani Yezu yigishaga abantu bakozwe ku mitima bifuza guhinduka niko kumubaza icyo bakora ngo bashyikire ubwiza bw’Imana.
Muri iyo nkubiri abasilikari nabo barabaza bati dukore iki?
Nawe ati ntimukagire umuntu muhongesha cg ngo mumurege ibinyoma kdi ibihembo byanyu bibanyure. Lukanos 3:14
Ntabwo twakwinjira mu buryo FPR ibeshejweho no guhongwa no kutanyurwa n’iby’iby’ifite, icyo ngarukaho nano n’ukuntu umusirikare nka Nyamvumba asuzugura Imana akajya gushinja ibinyoma abizi neza kdi abishaka.
Mu nkoranyabitabo nkirisitu dusangamo umwami w’umupagane wemereye uwari umuhanuzi w’Imana (ariko wari wamaze kugwa) ibiguzi ngo avume ubwoko bwayo. Kubara 22:21-…..
Umupagane yamusezeranije kuzamushyira hejuru akamuha icyubahiro cyinshi cyane ndetse akaba yamukorera icyo yifuza cyose.
Iyo ushishoje neza ubona ko hari amasezerano yo mu mpisho abapagani bagiranye na FPR ngo niyasohoza bazayihe ikuzo, bayizamure mu ijuru idapfuye kdi bayihe uruhusa rwo gukora ibyo ishaka byose harimo no kunyuruza abantu no kubacuruza.
Imyaka 29 irashize FPR yidegembya ikora ibyo ishaka ikagororerwa. Ubu ntibigikunda. Umukino urashaje batama. Burya si buno kdi i Burundi si i Bugoyi, amazi si ya yandi. Niba FPR yariyemeje guhangana n’abanyarwanda nibakenyere bakomeze. Niba no gukomeza guhishira ko batubaha icyunamo bibananiye, bakiha gushaka gukoresha ibirori byo gucinja imponoke ya jenosidi mu cyumweru cy’icyunamo nibamenye ko iminsi iyo ibaye myinshi ihinyuza intwari.
Igihe kirageze kugirango babone ko urugamba bashoje ku banyarwanda bagiye kurutsindwa burundi kdi ibyabereye mu nyanja bikangure n’abandi ko nta mikino igihari kdi ukuri kuzatsinda ikinyoma
Yakobo 2:4-6 hagira hati: dore ibihembo by’abasaruzi basaruye imirima yanyu, ibyo mwabimishije uburiganya, birataka, kdi umuborogo w’abo basaruzi winjiye mu matwi y’Uwiteka nyiringabo. Mwaradamaraye mu isi, mwishimira ibibanezeza bibi, mwihagije mu mitima ku munsi wo kurimbuka. Umukiranutsi mwamuciriyeho iteka muramwica atabarwanya.
Koko rero ngo mufite amayeri 1000, mufite ubwenge bwa Kavukire nka bumwe bwavugaga ko umwana avukana ishaka cg igishyimbo sinkibyibuka, mwaradamaraye ntimukimenya amasano, dore ko mwajijwe kuva mukiga umushinga wo gutera u Rwanda.
Kuki mudashobora no kubahiriza icyunamo mwishyiriyeho ngo mwubahe abatutsi n’abandi bishwe kdi mubigizemo uruhare. Buriya koko byari kugenda gute iyo Kalisiti apfa mu cyunamo? Harya ngo si ubwa mbere bikozwe. Ngo tuzasakuza tugere aho duhore. Siko bizahora.
Harya Bizimana yatanze itegeko ngo uzavuga nabi ubuyobozi bwa Kagame azarwanywe cyane cyane naba uwacitse ku icumu. Eeeeh !!!! nimushyimo imbaga ariko mumenye ko iminsi ikuna ingwe kdi igateka inzovu mu kabya.
Mpora nibaza ibirori umuzaza yari kugira avuye USA mu butembere mu cyumweru cy’icyunamo abona Kalisiti imbere ye. Nibaza ibikomere n’amarira byari gutera! Ese mubona umubaro n’agahinda abanyarwanda dufite bidahagiye? Harya ngo niba ubabaje umuntu ujye ugeza kure.
Wirukana umuntu cyane ukamumara ubwoba.
FPR na Kagame nibamenye ko ubwoba atari bwo bwajyanye abantu muri Nyungwe, ahubwo ubutwari bwo kwiyemeza.
Aho bukera barandika kuri buri giti cyose :” HANO NTA MUNYABWOBA UHARI” ayo niyo magambo yari yanditswe ku mazu y’abirabure igihe bari bayimeje guhangana n’ababarenganyaga. Bashobora kubabara ibirenge ariko umutima wo kugera i Kigali barawufite (niko mbikeka) kdi nzabategerereza ahantu heza mbashyiriye indabo.
Harya ngo muri ya ndege harimo uruboho rw’impiya.
Yewe umunyamigani hari icyo yabivuzeho, imigani 11:4 ati,
Ubutunzi ntacyo bumara ku munsi w’uburakari, ariko gukiranuka kudukiza urupfu, gukiranuka k’umuntu uboneye kuzamutunganyiriza inzira, ariko umunyabyaha azagushwa n’ibyaha bye, gukiranuka kw’abatunganye kuzabarokora ariko abariganya bazaterwa no kugira nabi kwabo.
Ng’uko ukuri kw’ibiri kubabaho kubera ko mwashogesheje kugeza aho mushinja abatutsi bari abana muri 1994 gutegura jenosidi yabakorewe.
Yeremiya 5:23-25 nawe yagize ati: ariko FPR ifite umutima winangiye w’ubugome, ntibajya bibaza ko ubugome bwabo aribwo buteje igihugu n’akarere akaga kugeza aho amahanga aduha akato ngo ntitukagire abashyitsi bizaniye impamba, ibicumuro n’ibyaha byayo nibyo bidukozeho kdi byadukozeho kera.
5:25-30 kuko muri FPR cg FPR ubwayo habonetsemo abantu babi cg ari babi: baca ibico nk’abatega inyoni imitego, baratega bagafata abantu.
Nk’urutanda rwuzuyemo inyoni niko amazu yabo yuzuyemo uburiganya. Nicyo cyabateye gukomera bakaba abakire. Barahonjotse ( barashishe). Ni ukuri imirimo y’ibyaha byabo barayikabya, ntibaburanira imfubyi ngo zigubwe neza kdi ntibarenganura umukene ahubwo baramusonga bamunyaga n’uduke atunze none se ubwo si abo kwangwa no kurwanywa?
Koko rero ngo baringanije indege n’abakarane ngo bajye kurenganya imfubyi kdi amafranga yagafashije abakene yashowe mu bikorwa byo gutega ibico nk’abatega inyoni.
Isi yose bayikwije abahigi n’abakarani, ibihararumbu byazobereye mu kwica n’abakarane.
Ubwo twibukaga abacu bishwe batabisemo uwari wagize amahirwe yo guhonoka ibihararumbo byo mu 1994 yari yongeye kugwa mu mu gico cya ba rushimuzi habura gato, aba arongeye ararokotse abahigi bataha barakaye umuranduranzuzi. Bitwibukije jcyunamo cyafashwemo Kizito, Ntanuhanga Na Nyamihirwa wishwe n’abandi bajyanye nawe muri icyo cyunamo.Kariya Kanyoni ko kigiriye mu ishyamba baragashakaho iki.
Imitego iba ku butaka naho utunyoni twibera mu mashami y’ibiti se wagirango tuzakururwa n’imitego y’abahigi.
Tuzirira imbuto zo mu bushorishore ubundi turirimbe dushima ko nibura n’amahanga yamenye ko turiho kdi tubangamiwe na Kagame na FPR ye.
Maze rero nshuti zanjye dushyiremo imbaraga , dukomeze kuburizamo ibico byo kuduhoza mu cyunamo, tubohoza abacu bamaze kugwa mu mitego. Muzi ubwoba inyoni zigira iyo zamaze gufatirwa mu mutego. Hari n’izipfa batarazikura mu mutego ngo bazirye.
Abatazi umubabaro wo kugwa mu mutego wa FPR baduhe amahoro bazabimenya nibabageraho
Yanditswe na Mpogazi Gitaminsi
