Abakinnyi 12 b’umupira w’amaguru beza b’ibihe byose ku mugabane wa Afr

Ku myaka 38 y’amavuko, Roger Milla yari umukinnyi w’igihangange mu mupira w’amaguru ubwo yakiniraga ikipe y’igihugu cye cya Cameroon mu mwaka w’1990, mu mikino y’igikombe cy’isi abasha gutsinda ibitego bine byatumye ikipe ye ibasha kwandika amateka yo kuba ikipe ya mbere yageze muri kimwe cya kane cy’imikino ya nyuma y’igikombe cy’isi. Roger Milla wavukiye mu murwa mukuru wa Cameroon witwa Yaounde, yagiye akinira amakipe nka Éclair Douala, Leopards of Doualana Tonnerre of Yaounde, aho yagiye ayafasha kwegukana ibikombe nawe agahabwa ibihembo byinshi nk’umukinnyi mwiza.
Mu mwaka w’1994 ubwo yari afite imyaka 42 y’amavuko, yaciye agahigo ko kuba umukinnyi ukuze wabashije gutsinda mu mikino ya nyuma y’igikombe cy’isi, icyo gihe akaba yaratsinze ikipe y’igihugu y’Abarusiya mu mikino ya nyuma y’igikombe cy’isi cyo mu mwaka w’1994. Icyamamare Pele wo muri Brazil kandi, mu mwaka wa 2004 yamushyize ku rutonde rw’abakinnyi 125 b’ibikomerezwa babayeho mu mateka y’umupira w’amaguru ku isi.
#2. Rabah Madjer (Algeria)

Mustapha Rabah Madjer yavutse tariki 15 Ukuboza 1958, akaba ari mu bakinnyi b’ibihangange muri Afrika. Yari rutahizamu w’igihugu cye cya Algeria, akaba ari mu bakinnyi bacye cyane b’abanyafurika babashije kujya gukina ku mugabane w’u Burayi mu gihe cye. Yabashije gukinira ikipe ya FC Porto yo muri Portugal mu mwaka w’1980. Uyu mukinnyi yari azwiho iyobera ryo gutsinda igitego kenshi ku munota wa 77 w’umukino, ibi akaba yaranabikoze muri FC Porto ayitsindira igitego cyo kwishyura ku mukino wa nyuma w’igikombe cy’u Burayi aho bakinaga na Bayern Munich.
Uyu mukinnyi yakiniye ikipe y’igihugu imyaka 19, anayikinira mu mikino ya nyuma y’igikombe cy’isi ibiri, mu mwaka w’1982 no mu mwaka w’1986. Yasezeye ku mupira w’amaguru ku myaka 31 y’amavuko abashije guca agahigo ko kuba rutahizamu wayitsindiye ibitego byinshi kuruta abandi, akaba kandi yarayifashije kwegukana igikombe cy’Afrika cy’ibihugu mu mwaka w’1990.
#3. George Weah (Liberia)

George Tawlon Manneh Oppong Ousman Weah wavutse tariki ya mbere Ukwakira 1966, ni icyamamare mu mupira w’amaguru, akaba akomoka mu gihugu cya Liberia. Uyu rutahizamu ufatwa nk’umwe mu bakinnyi b’ibitangaza umugabane wa Afrika wagize, mu mwaka w’1995 yabaye umukinnyi w’umwaka wa FIFA anegukana umupira wa zahabu (Ballon D’Or). Mu myaka y’1989, 1994 n’1995 kandi yabaye umukinnyi mwiza w’umwaka ku mugabane wa Afrika. Mu mwaka wa 2004, yashyizwe ku rutonde rwa FIFA rw’abakinnyi 100 b’ibihangange mu mupira w’amaguru bakiriho.
Nyuma yo gukina mu makipe atandukanye yo mu gihugu cye akegukana ibikombe n’ibihembo byinshi bitandukanye, George Weah yagiye ku mugabane w’u Burayi mu mwaka w’1988, asinyishwa na Arsene Wenger watozaga ikipe ya Monaco muri icyo gihe, uyu mukinnyi akaba yaranafashije Wenger kugwiza ibigwi kugeza ubwo agizwe umutoza w’ikipe ya Arsenal agitoza kugeza ubu.
Uyu mukinnyi kugeza ubu ni we wabaye uwa mbere ndetse nta n’undi munyafurika uramukurikira mu kwegukana umupira wa Zahabu. Uyu mukinnyi kandi yatwaye ibihembo n’ibikombe ari mu makipe nka AS Monaco, Paris Saint Germain na AC Milan.
#4. Kalusha Bwalya (Zambia)

Kalusha Bwalya yabaye umukinnyi w’igihangange wo muri Zambia, aza kuba umutoza naho kugeza ubu ayobora ishyirahamwe ry’umupira w’amaguru mu gihugu cye. Ni uwa kabiri mu bakinnyi babashije gutsindira igihugu cye ibitego byinshi, akaba anafatwa nk’umukinnyi mwiza kurusha abandi wabayeho mu mateka y’iki gihugu. Yabaye umukinnyi w’umwaka ku mugabane wa Afrika mu mwaka w’1988, anashyirwa ku rutonde rw’abakinnyi beza ku isi b’umwaka, urutonde rwakozwe na FIFA mu mwaka w’1996 akaza ku mwanya wa 12 ku isi.
Bwalya yari mu ikipe ye yo mu mwaka w’ 1988 yitabiriye imikino ya Olympic, abasha no guca agahigo muri iyo mikino ubwo yatsindaga wenyine ibitego 3 muri 4 ku busa ikipe ye yatsinze u Butaliyani. Hagati y’umwaka w’1983 na 2014, yabashije gukina imikino mpuzamahanga 147 atsindamo ibitego 100.
#5. Abedi Pele ( Ghana)

Abedi Ayew wavutse tariki 5 Ugushyingo 1964, azwi cyane nka Abedi Pele, akaba yarahoze ari umukinnyi w’ikipe y’igihugu cya Ghana, benshi bakaba bamufata nk’umukinnyi wa mbere w’ibihe byose ku mugabane wa Afrika.
Abedi Pele ari mu bakinnyi b’abanyafurika bubatse amateka akomeye I Burayi. Niwe mukinnyi w’umunyafurika wagiye afasha amakipe menshi y’I Burayi kubaka amateka akomeye. Yakinnye muri Suwedi, mu Budage, mu Butaliyani ndetse no mu Bufaransa ari naho yanditse amateka akomeye cyane ubwo yakinaga muri Marseille, cyane cyane mu mikino ya Champions League yo mu mwaka w’1990.
Yabaye Kapiteni w’igihugu cye mu gihe cy’imyaka itandatu, akaba yarabashije kuba umukinnyi w’umwaka mu Buraransa inshuro eshatu zose, abasha kwegukana igihembo cya BBC cy’umukinnyi w’umunyafurika w’umwaka mu 1992, ndetse n’ibindi bikombe byinshi bitandukanye. Yabashije kuba umukinnyi witwaye neza kurusha abandi mu mukino wa nyuma wa Champions League wahuje ikipe ye ya Marseille na Milan AC mu mwaka w’1993 akabasha no gufasha iyi kipe kwegukana igikombe.
#6. Tony Yeboah (Ghana)

Anthony Yeboah wavutse tariki 6 Kamena 1966, ni umunya Ghana wakiniye iki gihugu nka rutahizamu kuva mu mwaka w’1981 kugeza muri 2002. Azwi nk’umukinnyi wubatse amateka mu gutsinda ibitego byinshi kandi byiza mu gihugu cye no ku mugabane wa Afrika. Yatsindiye ikipe ya Ghana ibitego 29 mu mikino 59, akaba ari rutahizamu wa gatatu wabashije gukora ibi nyuma ya Abedi Pele na Asamoah Gyan.
Yeboah yakiniye ikipe ya FC Saarbrücken yo mu Budage guhera mu mwaka w’ 1988 yandikwa mu mateka y’umukinnyi wa mbere w’umwirabura wabashije gukina muri shampiyona y’Abadage. Muri iyi myaka, abakinnyi benshi bakinaga mu Budage babaga ari abenegihugu, bacye b’abanyamahanga nabo bakaba ari abazungu b’abanyaburayi.
Yeboah ntuyabashije gutsinda ibitego byinshi muri uwo mwaka, ariko umwaka ukurikiyeho yabashije kugeza kure ikipe ye ayitsindira ibitego 17. Ibi byatumye ahita ashakishwa n’andi makipe, Eintracht Frankfurt n’ubwo aha yakorewe ivanguraruhu n’abafana nk’umwirabura wa mbere wari ugeze muri iyo kipe. Ibyo ariko ntibyamubujije kuba rutahizamu utangaje, bituma abafana batangira kumukunda anaba icyamamare cyane mu gihugu. Yabaye rutahizamu wa mbere w’umwaka w’1993 ndetse n’uw’1994. Ibi byatumye shampiyona y’u Budage itangira kujyamo n’abandi banyafurika nka Jay-Jay Okocha, Samuel Kuffour na Souleyman Sané
#7. Samuel Osei Kuffuor (Ghana)

Samuel Osei Kuffour wavutse tariki 3 Nzeri 1979, ni umunya Ghana wubatse amateka akomeye cyane mu mupira w’amaguru. Ari mu bakinnyi beza ikipe ya Bayern Munich yagize mu mateka yayo, akaba yarayifashije gutwara ibikombe 17 bikomeye ndetse anayikinira imikino hafi 250. Ari mu bakinnyi b’abanyafurika babashije kwegukana igikombe cya Champions League hamwe n’iyi kipe yo mu Budage mu mwaka w’2001 ari nawe wayitsindiye igitego cy’intsinzi muri uwo mwaka mu mikino y’igikombe cy’isi cy’ama Clubs. Muri uwo mwaka kandi yabashije kuba umukinnyi wa kabiri mwiza w’umunyafurika, umwanya yari yabonye no mu mwaka w’1999.
Yabaye myugariro w’ibihe byose ukiri muto wabashije gutsinda mu mikino ya Champions League kandi akina inyuma, mu mwaka w’1994 akaba yari afite imyaka 18 gusa y’amavuko. Kuffour yakinnyi imikino irenga 60 muri UEFA Champions League, ibi bikaba bitarigeze bikorwa n’undi mukinnyi n’umwe w’umunyafurika.
#8. Samuel Eto’o Fils (Cameroon)

Samuel Eto’o Fils wavutse tariki 10 Werurwe 1981 ni igihangange mu mupira w’amaguru, akaba akomoka muri Camerron. Niwe ufite agahigo ko kubasha kwegukana igihembo cy’umukinnyi mwiza w’umwaka muri Afrika inshuro nyinshi, akaba yaracyegukanye mu mwaka wa 2003, 2004, 2005 na 2010. Muri 2005, yari ku mwanya wa gatanu w’abahataniraga umukinnyi w’umwaka wa FIFA.
Eto’o yatsinze ibitego birenga 100 mu myaka itanu yamaze muri FC Barcelona, akaba ari nawe munyafurika waciye agahigo ko gukina muri Sampiyona ya Espagne igihe kirekire. Muri 2010, yabaye umukinnyi wa mbere ukomoka hanze y’umugane w’u Burayi wabashije wabashije kwegukana ibikombe by’amakipe yabaye aya mbere iwayo, muri Barcelona no muri Inter Milan. Ni umukinnyi wa kabiri mu mateka wabashije gutsinda igitego mu mikino ya nyuma ya UEFA Champions League atsindira amakipe atandukanye, akanaba uwa kane nyuma ya Marcel Desailly, Paulo Sousa, and Gerard Piqué, mu kuba barabashije kwegukana igikombe cya UEFA Champions League mu makipe abiri atandukanye.
Hamwe n’ikipe y’igihugu cya Cameroon, Eto’o yabashije kwegukana igikombe cy’imikino ya Olympic mu mwaka wa 2000. Yabashije gukinira ikipe ye mu mikino ya nyuma y’igikombe cy’isi inshuro eshatu zose, n’imikino ya nyuma itandatu y’igikombe cy’Afrika cy’ibihugu, muri iyi akaba yarayifashije kwegukana ibikombe cy’Afrika inshuro ebyiri. Ni nawe mukinnyi wa mbere kugeza ubu watsinze ibitego byinshi muri iyi mikino y’igikombe cy’Afrika cy’ibihugu, n’ibitego 18. Ni nawe kandi watsindiye igihugu cye ibitego byinshi mu mateka, akaba yaratsinze ibitego 56 mu mikino 118. Yasezeye mu ikipe y’igihugu tariki 27 Kanama 2014.
#9. Jay Jay Okocha ( Nigeria)

Augustine Azuka “Jay-Jay” Okocha yavutse tariki 14 Kanama 1973, akaba ari umunya Nigeria wubatse amateka akomeye mu mupira w’amaguru. Gutsinda ibitego, amacenga n’ubuhanga mu kibuga, bituma afatwa nk’umukinnyi wa mbere w’umunya Nigeria wabbashije kwitwara neza mu gihe cye.
Mu mwaka w’1998 yaguzwe miliyoni 24 z’amadolari n’ikipe ya Paris Saint Germain yo mu Bufaransa, icyo gihe akaba ari we mukinnyi w’umunyafurika wari ubashije kugurwa ayo mafaranga. Yakiniye iyi kipe imyaka ine, akina imikino 84 abasha gutsindamo ibitego 12. Icyo gihe kandi yafashaga rutahizamu wo muri Brazil Ronaldinho bakinanaga icyo gihe mu Bufaransa.
Yakiniye kandi ikipe ya Bolton yo mu Bwongereza, abasha kuyihesha igikombe cya League Cup nyuma y’imyaka 8 bari bamaze badakora ku kitwa igikombe. Icyo gihe yari kapiteni w’iyi kipe.
Okocha ntiyigeze abasha kuba umukinnyi w’umwaka muri Afrika n’ubwo yabashije kuba uwa kabiri inshuro ebyiri. Mu mwaka w’1998 yabonye igihembo cya FIFA cy’umukinnyi w’umunyafurika witwaye neza I Burayi, yongera kucyegukana mu mwaka ukirikiyeho bituma aca agahigo ko kukigumana imyaka ibiri ikurikirana. Uyu mukinnyi kandi yagiye abasha kwegukana ibihembo n’ibikombe bitandukanye mu makipe yagiye akinira.
#10. Nwankwo Kanu (Nigeria)

Nwankwo Kanu wavutse tariki ya mbere Kanama 1976), ni rutahizamu wubatse amateka akomeye ubwo yakiniraga igihugu cye cya Nigeria, yabashije gukinira imyaka 16 yose, kuva mu mwaka w’1994 kugeza mu mwaka w’2010. Yatwaye umudari wa zahabu mu 1996 mu mikino Olympic, anitabira imikino ya nyuma y’igikombe cy’isi mu mwaka w’1998 na 2002. Mu ikipe y’igihugu yabashije gutsinda ibitego byinshi no kuyifasha kugera kuri byinshi, kuburyo ari umwe mu bakinnyi bubahwa cyane muri Nigeria.
Ni umwe mu bakinnyi bacye babashije kwegukana igikombe cya shampiyona cy’u Bwongereza, FA Cup, Champions League, UEFA Cup n’umudari wa zahabu mu mikino Olympic. Niwe mukinnyi wa gatatu wakinnye mu Bwongereza mu bicaye ku ntebe y’abasimbura kenshi kuko yahicaye inshuro 118.
#11. Yaya Toure (Ivory Coast)

Yaya Touré wavutse tariki 13 May 1983), ubu akinira ikipe ya Manchester City yo mu Bwongereza akanakinira ikipe y’igihugu cye cya Cote d’Ivoire. Uyu mukinnyi ufatwa nka rutahizamu kubera ibitego byinshi atsinda, yatangiye kuba icyamamare ku rwego rw’isi muri 2009 ubwo yakiniraga ikipe ya FC Barcelona, harimo no ku mukino wa nyuma wa UEFA Champions League y’uwo mwaka. Uyu mukinnyi ukina hagati asubira n’inyuma, yatangiriye umupira we mu ikipe ya ASEC Mimosas yo mu gihugu cye.
Touré yajyanye n’ikipe y’igihugu cye mu mikino ya nyuma y’igikombe cy’Afrika inshuro esheshatu, muri 2006, 2008, 2010, 2012, 2013 na 2015 ; muri aya marushanwa bakaba barageze ku mukino wa nyuma (final) mu mwaka wa 2006 no mu mwaka wa 2012, naho muri 2015 we n’ikipe y’igihugu cye babasha kwegukana iki gikombe. Touré yashyizwe ku rutonde rw’ikipe ya Afrika muri 2008, 2012 na 2015. Tariki Gashyantare 2015, Touré yatsinze igitego cyafunguye umukino wa kimwe cya kabiri cy’irangiza cy’imikino y’Igikombe cy’Afrika batsinzemo Kongo Kinshasa ibitego 3-1, naho tariki 8 Gashyantare abasha kuyobora ikipe nka Kapiteni batwara iki gikombe igihugu cye cyaherukaga mu mwaka w’1992.
#12. Didier Drogba (Ivory Coast)

Tébily Didier Yves wavutse tariki 11 Werurwe 1978 nawe ni umukinnyi ufite amateka atoroshye mu mupira w’amaguru ku rwego rw’isi. Azwi cyane ubwo yakinaga mu ikipe ya Chelsea yo mu Bwongereza, ikipe yabashije gutsindamo ibitego bitigeze bibasha gutsindwa n’undi munyamahanga uwo ari we wese. Muri 2012, yatowe n’abaterankunga ba Chelsea nk’umukinnyi wayo w’ibihe byose uruta abandi. Drogba yegukanye igihembo cy’umukinnyi mwiza w’umwaka ukomoka muri Afrika muri 2006 no muri 2009.
Muri 2004, Drogba yaguzwe miliyoni 24 z’ama Pounds ajya muri Chelsea, bituma icyo gihe aga agahigo ko kuba umukinnyi uhenze kurusha abandi mu mateka y’abakinnyi bakomokaga mu gihugu cye. Icyo gihe yabafashije gutwara igikombe cyabo cya mbere mu myaka 50 yari ishize, no mu mwaka ukurikiyeho barakisubiza. Mu mwaka wa 2012, yaciye agahigo ko kuba umunyafurika wa mbere wabashije gutsinda ibitego 100 muri shampiyona y’Abongereza. Muri uwo mwaka yabashije no gutsinda mu mukino wa nyuma wa UEFA Champions League wabahuje na Bayern Munich.