Ubu BUSAMBO bwa leta ya Kagame bwo kwiba no gutwara ku ngufu ubutaka bw’abaturage buzarangira ryari?

Gasabo: Abaturage ntibavuga rumwe n’Umujyi wa Kigali ku butaka wabirukanyemo. Abaturage bakoreraga ibikorwa byabo mu gishanga cya Kibagabaga kiri hagati y’imiregenge ibiri ya Kimironko na Remera mu Karere ka Gasabo mu Mujyi wa Kigali, bavuga ko bahangayikishijwe no kutazabona aho bazagana nyuma yo kwirukanwa mu mirima yabo.

Abaturage babarirwa muri 30 bahangayitse ni abo mu tugari twa Remera, Nyagatovu na Kibagabaga two mu mirenge ya Kimironko na Remera, bagaragaza ko ari isambu barazwe n’abasekuruza, abandi bakaba abaguze.

Umujyi wa Kigali uherutse kubandikira mu cyumweru gishize, buri wese ukamubwira kutarenza iminisi irindwi abonye ibaruwa kuba yakuye ibikorwa bye kuri ubwo butaka, batinda ukazabyikuriraho bagahemba abakozi bakoreshejwe.

Abakorera muri iki gishanga bose bavuga ko bafite ibyangombwa byo kuhakorera, bakaba batumva impamvu yo kukirukanwamo shishi itabona nta ngurane.

Umwe yagize ati “ Imirima yanjye bagiye gutwara ifite nka m 70 kuri m 100, niho hantungiye umuryango, niho ntuye, nahahingaga imboga, mfitemo ubuhinzi bw’urutoki, mfitemo icyuzi cy’amafi, mfitemo ibijumba , mfitemo amapera, mfitemo n’igipande kirimo ibisheke. Batubwiye ko mu minsi irindwi tugomba kuba twaravuyemo ariko ntibatubwira aho tuzagana.”

Undi yagize ati “Narimpororeye inka n’ingurube, narimfitemo n’urutoki nkanahingamo imboga mu gihe nk’iki cy’izuba, twe twumva icyaba cyiza ari uko bahaturekera tugakomeza kuhahinga byaba ngombwa ko batwimura bakaba badushakira ahandi cyangwa bakaduha ingurane ikwiranye n’ibikorwa twari tuhafite.”

Mu gihe abaturage barira ayo kwarika, Umuyobozi w’Umujyi wa Kigali wungirije ushinzwe iterambere ry’ubukungu, Parfait Busabizwa, yavuze ko kwandikira abo baturage byakozwe muri gahunda yo gushyira mu bikorwa ibiteganywa ku gishushanyo mbonera.

Yagize ati “Abantu bahawe iminsi irindwi ni abantu bafitemo ibikorwa bakoreramo kandi nta cyangombwa na kimwe bafite, abafite ibyangombwa ntabwo bahawe iminsi irindwi ahubwo barababaruye kuko igikorwa turimo ni igikorwa cyo kubarura.”

Yongeyeho ati “Ni gahunda yo gushyira mu bikorwa igishushanyo mbonera, ni ukuvuga ko nta kwangiza ibishanga, nta gupfa kujya mu bishanga ngo ukore icyo ushatse, ariko hakaba hari abantu bari bafite ibyangombwa kuva kera n’ayo mabwiriza ataraza n’igishushanyombonera kitaraza, turi kubabarura ngo tumenye ibyo bafitemo nyuma hakazaza undi murongo uzatangwa.”

Gusa avuga ko n’ubundi amaherezo ari uko abantu bose bazavamo mu rwego rwo gushyira mu bikorwa amabwiriza ateganywa mu gishushanyo mbonera cy’Umujyi wa Kigali.

Abaturage bavuga ko hari amakuru bamenye ko hari umuntu uburana icyo gishanga avuga ko Minisiteri y’Ubuhinzi n’Ubworozi (MINAGRI), yakimuhaye mu 1999 .

Mukarutesi (izina twamuhaye), yagize ati “ Batubwira ko uwo muntu yagiye ku karere kurega abaturage, njyewe ndi kavukire, uwo muntu ntazi aha n’igihe nahabereye kuva mvutse ubu mfite imyaka 40, njyewe n’abagiye bahakodesha ndabazi ariko uwo ntawe nigeze mbona nta n’ibikorwa bye nzi aha.”

Busabizwa Parfait we yahakanye amakuru y’uko hari uwaba ari gusaba icyo gishanga ngo gikurwemo abaturage.

Igishanga gihingwamo n’abaturage bandikiwe ko bagomba kukivamo

Uhageze abona ko hari n’abaturage bahatuye kuva kera

Abaturage bahingamo bakanakoreramo imirimo y’ubworozi
Igihe.com